Amerika "yadohoye gahunda yo kutakira umwimukira n'umwe"

Abategetsi baravuga ko gahunda z'ubutegetsi bwa Perezida Donald Trump zo kutakira umwimukira n'umwe zikiriho Uwufise ububasha kw’isanamu Getty Images
Image caption Abategetsi baravuga ko gahunda z'ubutegetsi bwa Perezida Donald Trump zo kutakira umwimukira n'umwe zikiriho

Umuyobozi ukuriye ibikorwa byo gucunga umutekano ku mupaka w'Amerika aravuga ko yabaye ahagaritse ibyo gutangira kurega mu nkiko abimukira binjiye muri iki gihugu mu buryo butemewe n'amategeko bari kumwe n'abana.

Komiseri Kevin McAleenan ukora mu rwego rwa gasutamo no kurinda umupaka yabwiye abanyamakuru muri leta ya Texas (imwe mu zigize Amerika) ko ibikorwa byo kurega abo bimukira mu nkiko byabaye bihagaritswe mu cyumweru gishize.

Yavuze ko ibi bije bikurikira iteka ryaciwe na Perezida Donald Trump mu cyumweru gishize risaba ko gutandukanya imiryango y'abimukira bihagarikwa.

Ariko Bwana Trump yari yatanze igitekerezo ko ahubwo abagize imiryango bafungirwa hamwe.

Uwufise ububasha kw’isanamu Getty Images
Image caption Perezida Trump yashyize umukono ku iteka rihagarika gutandukanya abagize imiryango y'abimukira ariko abana babarirwa mu bihumbi baracyatandukanye n'imiryango yabo

Perezida Trump uva mu ishyaka ry'aba Repubulikani ku wa gatatu ushize yavuye ku izima kubera igitutu yocyejwe n'abaturage, ashyira umukono ku iteka ryo "kugumisha imiryango hamwe" aho abimukira bafungiwe.

Bwana McAleenan yibukije ko gahunda z'ubutegetsi bwa Perezida Trump zo kutakira umwimukira n'umwe zikiriho, nubwo bwose amabwiriza uyu mukomiseri ubu aha abo akuriye mu kazi ahanini ashyira izo gahunda mu rujijo.