Ba nyamweru bagiye kwiyamamariza ubuperezida muri Malawi

Impirimbanyi ziravuga ko bizagabanya ipfunwe ba nyamweru bagira

Ahavuye isanamu, Getty Images

Insiguro y'isanamu,

Impirimbanyi ziravuga ko bizagabanya ipfunwe ba nyamweru bagira

Ikinyamakuru The Guardian cyo mu Bwongereza kiratangaza ko abakandida batandatu ba nyamweru bari mu baziyamamariza kuyobora Malawi mu matora ya perezida ateganyijwe kuba mu 2019.

Overstone Kondowe, umuyobozi w'ishyirahamwe rya ba nyamweru muri Malawi, yabwiye iki kinyamakuru ati: "Turashaka kwereka rubanda ko dufite ikindi turi cyo kirenze icyo turi kubera uruhu rwacu".

Ishyirahamwe Bwana Kondowe ayoboye ryijeje ko rizatanga abakandida batandatu mu matora ya perezida n'ay'abadepite, mu cyo bemeza ko kizahindura imyumvire ya rubanda kuri ba nyamweru.

Muri Malawi, cyo kimwe no mu bindi bihugu byo mu karere Malawi iherereyemo, ba nyamweru barahigwa kubera ko hari abafite imyemerere ko ibice bimwe by'imibiri yabo bitera ishaba ndetse bigatanga n'ubukire.

Mu mwaka wa 2016, impuguke y'umuryango w'abibumbye yaburiye ko ba nyamweru bo muri Malawi bagera ku bihumbi 10 bari mu byago byo "gushiraho" niba bakomeje kwicwa kubera ibice by'imibiri yabo baba bashakwaho.

Imva za ba nyamweru nazo ziribasirwa aho abakora ibikorwa by'urugomo bazikuramo amagufa ya ba nyamweru bakayagurisha.

Impirimbanyi zivuga ko ubukene bugira uruhare mu byo ba nyamweru bacyekwaho ndetse no kwemeza ko ibice by'imibiri yabo bishobora gucuruzwa ku kayabo k'amafaranga.