Abahungu bagisigaye mu buvumo muri Thailande bategereje kurokorwa

Imodoka y'imbangukiragutabara itwaye umwe mu bahungu bari bamaze gukurwa mu buvumo bwa Tham Luang Nang Non ku cyumweru Uwufise ububasha kw’isanamu Getty Images
Image caption Imodoka y'imbangukiragutabara itwaye umwe mu bahungu bari bamaze gukurwa mu buvumo bwa Tham Luang Nang Non ku cyumweru

Abahanga mu koga bibira mu buvumo bitezwe kongera gutangira igikorwa cy'ubwihanduzacumu cyo kugerageza kurokora abahungu 8 n'umutoza wabo w'umupira w'amaguru bagisigaye mu buvumo budenduye bwugarijwe n'imyuzure mu gihugu cya Thailande.

Ku cyumweru, abahungu bane bakuwe mu buvumo amahoro.

Ariko mu ijoro ryo ku cyumweru, iki gikorwa cy'ubutabazi cyabaye gihagaritswe kugira ngo ibikoresho bibika umwuka wo guhumeka bihindurwe.

Aba bahungu baheze mu buvumo ku itariki ya 23 y'ukwezi gushize kwa gatandatu, nyuma yaho imvura nyinshi yaguye igateza imyuzure mu buvumo. Ariko mu cyumweru gishize, abahanga mu byo koga bibira babasanze bakiri bazima.

Abakora mu bikorwa by'ubutabazi bafashe icyemezo cyo gukomeza igikorwa cy'ubwihanduzacumu cyo kubatabara kubera ko hari ubwoba ko amazi yakongera kwiyongera mu buvumo.

Kuri uyu wa mbere, abategetsi ba Thailande baravuga ko abahungu bagisigaye mu buvumo bari gukurwamo.

Imodoko z'imbangukiragutabara zamaze kwerekeza ku muryango w'ubuvumo.

Abakora mu bikorwa by'ubutabazi bafatiranye ko ku cyumweru hiriwe nta mvura iguye, batangira igikorwa cyo kurokora aba bahungu mbere y'igihe ubundi bateganyaga kubikora.

Abategetsi ba Thailande baravuga ko icyo gikorwa "cyagenze neza" kandi n'abahungu barokowe "bafite ubuzima bwiza".

Ariko kubera imvura yaguye mu ijoro ryo ku cyumweru ndetse amakuru y'iteganyagihe akaba avuga ko hitezwe indi mvura nyinshi mu minsi iri imbere, aba bahanga mu koga bibira barasabwa gukora bwangu mu kurokora abagiheze mu buvumo.

Uwufise ububasha kw’isanamu Getty Images
Image caption Abahanga bari gutegura amacupa y'umwuka akoreshwa mu koga bibira

Ku wa gatandatu, Guverineri Narongsak Osottanakorn w'intara ya Chiang Rai yo mu majyaruguru ya Thailande ari naho ubu buvumo buri, yavuze ko amatsinda y'abatabazi afite igihe kiri hagati y'iminsi itatu n'ine yo gukora icyo gikorwa cy'ubutabazi.

Aba bahungu n'umutoza wabo ni bande?

◾Chanin Vibulrungruang, w'imyaka 11 y'amavuko (bamuhimba Titan) - yatangiye gukina umupira w'amaguru afite imyaka irindwi

◾ Panumas Sangdee, w'imyaka 13 y'amavuko (bamuhimba Mig), yandikiye ababyeyi be agira ati: "Abasirikare kabuhariwe barimo kunyitaho"

◾ Duganpet Promtep, y'imyaka 13 y'amavuko (bamuhimba Dom) - ni kapiteni w'ikipe yabo yitwa the Wild Boars, amakuru avuga ko hari amakipe menshi yo muri Thailande ashaka kumugura

◾ Somepong Jaiwong, w'imyaka 13 y'amavuko (bamuhimba Pong) - amakuru avuga ko afite inzozi zo gukinira ikipe y'igihugu ya Thailande

◾ Mongkol Booneiam, w'imyaka 13 y'amavuko (bamuhimba Mark) - umwarimu we yavuze ko ari umwana "wubaha cyane kandi w'imico myiza"

◾ Nattawut Takamrong, w'imyaka 14 y'amavuko (bamuhimba Tern) - yabwiye ababyeyi be ngo ntibamuhangayikire

◾ Ekarat Wongsukchan, w'imyaka 14 y'amavuko (bamuhimba Bew) - yasezeranyije nyina umubyara ko namara kurokorwa azajya amufasha gucuruza mu iduka

◾ Adul Sam-on, w'imyaka 14 y'amavuko - anakina mu ikipe y'umukino w'intoki wa volleyball yabaye iya kabiri mu irushanwa rihuza amakipe yo mu majyaruguru ya Thailande

◾ Prajak Sutham, w'imyaka 15 y'amavuko (bamuhimba Note) - abo mu muryango we bavuze ko ari umuhungu "uzi ubwenge kandi ucisha macye"

◾ Pipat Pho, w'imayaka 15 y'amavuko (bamuhimba Nick) - yandikiye ababyeyi ibaruwa abasaba ko namara kurokorwa bazamusohokana akajya kurya inyama zocyeje muri resitora

◾ Pornchai Kamluang, w'imyaka 16 y'amavuko (bamuhimba Tee) - yabwiye ababyeyi be ati: "Ntimuhangayike, ndishimye cyane"

◾ Peerapat Sompiangjai, w'imyaka 17 y'amavuko (bamuhimba Night) - ubwo aba bahungu baburirwaga irengero wari umunsi w'isabukuru ye y'amavuko, none ababyeyi be bamubwiye ko na n'ubu bakimutegereje ngo bamukorere umunsi mukuru wo kwizihiza isabukuru ye y'amavuko

◾Umutoza wungirije Ekapol Chantawong (bahimba Ake), w'imyaka 25 y'amavuko - yandikiye ibaruwa imiryango y'aba bahungu ayisaba imbabazi, ariko iyi miryango yamusubije ko itamurenganyiriza ibyabaye

Ibindi bisa n’ibi