Urubanza rw'abaregwa kurema umutwe urwanya u Rwanda rwasubitswe

Aba bayoboke ba FDU Inkingi baregwa gushinga umutwi urwanya ubutegetsi
Image caption Aba bayoboke ba FDU Inkingi baregwa gushinga umutwi urwanya ubutegetsi

Urukiko rukuru rwa Kigali rwategetse isubikwa ry'urubanza rw'abayoboke 11 b'ishyaka FDU Inkingi baregwa ibyaha birimo gushaka kugirira nabi ubutegetsi buriho.

Abaregwa 10 kuri cumi n'umwe bakurikiranywe ni bo bitabye urukiko uyu munsi, bunganiwe n'abanyamategeko babiri, Gatera Gashabana na Antoinnette Mukamusoni.

Uwitwa Nkiko Erneste, uwa 11 mu baregwa, ntiyagaragaye mu rukiko kuko atitabye.

Uyu akurikiranywe adafunze kuko urukiko rwasanze nta mpamvu zihagije zituma akurikiranwa afunze.

Ukutagaragara kwe mu rukiko kwakuruye impaka nyinshi, abunganira abaregwa basaba ko abitabye baburanishwa undi nawe igihe azabonekera akaburanishwa mu rubanza rwihariye.

Ubushinjacyaha bwo ariko bwavugaga ko abaregwa bose bagomba kuba mu rubanza rumwe kuko ibirego ari bimwe kandi hakaba aho bamwe ari abafatanyacyaha b'abandi.

Umucamanza yategetse ko urubanza rusubikwa kugeza ku itariki ya 30 z'uku kwezi, asaba ko utagaragaye ahamagazwa akazitaba kugira ngo aburanire rimwe n'abandi.

Gusa yavuze ko nta yindi nzitizi izongera kwakirwa, ko urubanza rugomba kuzahita ruburanishwa ruhereye mu mizi.

Baregwa iki?

Aba 11 byemezwa ko ari abayoboke b'ishyaka FDU Inkingi baregwa kurema umutwe w'ingabo utemewe no kugirira nabi ubutegetsi buriho.

Ubushinjacyaha buvuga ko bafatiwe mu duce dutandukanye ndetse bamwe bafatwa bagerageza kwambuka umupaka ngo bajye muri Kongo kwifatanya n'uyu mutwe bashinjwa kurema.

Umutwe uvugwa ngo ni uwitwa P5 uhuriwemo n'amashyaka atanu arwanya ubutegetsi bw'u Rwanda arimo n'irya RNC ribarizwamo uwahoze ari umugaba w'ingabo z'u Rwanda, General Kayumba Nyamwasa wahungiye muri Africa y'epfo.

Bamwe mu baregwa bemera ko ari abayoboke ba FDU Inkingi ndetse ko banazi ihuriro P5 uretse ko bongeraho ko iri huriro rigamije kurwana urugamba rwa politiki rutarimo amasasu.

Uwufise ububasha kw’isanamu Getty Images
Image caption Umukuru wa FDU Inkingi, Victoire Ingabire, yatakiwe gufungwa imyaka 15

Bose bahakana ko batigeze baba mu mutwe wa gisirikare baregwa gushinga, bakavuga ko bafunzwe bazira ibitekerezo bya politiki.

Mu kwezi kwa 9 k'umwaka ushize ni bwo aba batawe muri yombi, bamwe bafatirwa hafi y'umupaka wa Kongo abandi bafatirwa mu mujyi wa Kigali cyangwa ahandi.

Gusa bose ubushinjacyaha buvuga ko berekezaga mu gihugu cya kongo kwitabira urugamba rwo kurwanya Leta.

Uretse abaregwa ko bafashwe berekeza iy'urugamba, abatawe muri yombi barimo n'uwari visi Perezida w'ishyaka, Boniface Twagirimana, we ushinjwa ko yahuzaga ibikorwa byose byo gushakisha abarwanyi.

Aregwa kandi kuba ari na we wabashakiraga impapuro za ngombwa n'amafranga y'urugendo.

Ibindi bisa n’ibi