Ubutabazi bwa nyuma bw'abaheze mu buvumo muri Thailande

Aba bahungu bari mu kigero kiri hagati y'imyaka 11 na 17 y'amavuko, baheze mu buvumo bari kumwe n'umutoza wabo ku itariki ya 23 y'ukwezi gushize kwa gatandatu Uwufise ububasha kw’isanamu Getty Images
Image caption Aba bahungu bari mu kigero kiri hagati y'imyaka 11 na 17 y'amavuko, baheze mu buvumo bari kumwe n'umutoza wabo ku itariki ya 23 y'ukwezi gushize kwa gatandatu

Abahanga mu byo koga bibira 19 ni bo berecyeje mu buvumo kuri uyu wa kabiri mu kugerageza gusoza igikorwa cyo gutabara abahungu bo mu ikipe y'umupira w'amaguru bagisigaye mu buvumo bwarengewe n'imyuzure mu majyaruguru ya Thailande.

Igisirikare kirwanira mu mazi muri Thailande cyatangaje ko umuhungu wa cyenda yakuwe mu buvumo, ndetse hari n'amakuru ataremezwa avuga ko abandi bahungu babiri nabo bakuwe mu buvumo kuri uyu wa kabiri.

Aya makuru naramuka yemejwe, umwana umwe n'umuntu mukuru umwe ni bo baba bagisigaje kurokorwa bavanwa mu buvumo - ibintu byaba bisoje igikorwa cy'ubutabazi bwa gitwari bwakomwe mu nkokora gusa n'urupfu rw'umwe mu batabazi boga bibira witabye Imana.

Uwageragezaga gutabara abaheze mu buvumo muri Thailande yapfuye

Thailande: Sentare yaciriye umwambuzi imyaka irenga 13000

Mbere yaho, umutegetsi wo muri Thailande yari yavuze ko abahungu umunani bamaze gukurwa mu buvumo kuri ubu bafite ubuzima bwiza, haba ku mubiri ndetse no mu bitekerezo.

Aba bahungu barokowe bakurwa mu buvumo mu minsi ibiri ishize. Banyujijwe mu cyuma ndetse bafatwa n'ibizamini by'amaraso. Babiri muri bo bavuwe ibihaha byari byatangiye kwangirika.

Mu gihe cy'iminsi nibura irindwi iri imbere, bagiye gukomeza gukurikiranwa bya hafi bari mu bitaro bya Chiang Rai Prachanukroh.

Mu gitondo cyo kuri uyu wa kabiri, abakora mu bikorwa by'ubutabazi bibira mu mazi bakomeje igikorwa cyo kugerageza kurokora abahungu n'umutoza wabo w'umupira w'amaguru bagisigaye mu buvumo bwaTham Luang cave.

Aho bari mu buvumo bari kumwe n'umuganga ndetse n'abasirikare bo mu mutwe kabuhariwe wa Thailande bari kubitaho.

Uwufise ububasha kw’isanamu AFP
Image caption Mu kiganiro n'abanyamakuru, abategetsi bavuze ko abahungu bamaze kurokorwa badahita bemererwa guhura n'ababyeyi babo

Abategetsi bafite icyizere ko uyu munsi ushobora kuba uwa nyuma w'iki gikorwa cy'ubutabazi.

Igikorwa giheruka cyo kugerageza kurokora abahungu basigaye n'umutoza wabo cyatangiye nyuma gato ya saa yine za mu gitondo ku isaha yo muri Thailande.

Iyi kipe y'umupira w'amaguru igizwe n'abahungu 12 n'umutoza wabo yaheze mu buvumo ku itariki 23 y'ukwezi gushize kwa gatandatu nyuma yaho imvura nyinshi yaguye igateza imyuzure.

Mu cyumweru gishize nibwo babonywe n'abahanga mu byo koga bibira.

Ibindi bisa n’ibi