Ubushinwa "bwumijwe" n'ibikorwa by'Amerika mu bushyamirane bushingiye ku bucuruzi

Amerika ivuga ko iyi misoro iterwa n'ubucuruzi burimo uburiganya bw'Ubushinwa Uwufise ububasha kw’isanamu Getty Images
Image caption Amerika ivuga ko iyi misoro iterwa n'ubucuruzi burimo uburiganya bw'Ubushinwa

Ubushinwa bwavuze ko "bwumijwe" no kuba Amerika yatangaje gahunda y'imisoro mishya ku bicuruzwa biva mu Bushinwa, ibintu byahuhuye intambara y'ubucuruzi hagati y'ibihugu byombi.

Amerika yatangaje urutonde rw'ibicuruzwa biva mu Bushinwa ishaka gusoresha imisoro ifite agaciro ka miliyari 200 z'amadolari y'Amerika.

Amerika yavuze ko iyi misoro izatangira kwakwa mu ntangiriro y'ukwezi kwa cyenda.

Amerika n'Ubushinwa byarashe amasasu ya mbere y'intambara y'ubucuruzi

Ubushinwa busaba Amerika "guhagarika amajambo n'ibikorwa vy'ububisha"

Ibi bibaye nyuma y'iminsi ibihugu byombi bishyiraniyeho imisoro ingana na miliyari 34 z'amadolari y'Amerika ku bicuruzwa biva mu gihugu kimwe bijya mu kindi. Byagaragaye nk'uburyo bwo kwihimuranaho.

Ubushinwa buravuga ko iyi misoro mishya yashyizweho n'Amerika "itemewe na gato." Bwongeyeho ko izagira ingaruka ku isi yose.

Itangazo rw'umuvugizi wa minisiteri y'ubucuruzi mu Bushinwa rigira riti:

"Imyitwarire y'Amerika iri gukomeretsa Ubushinwa, igakomeretsa isi ndetse igakomeretsa n'Amerika ubwayo."

Uyu muvugizi yanavuze ko leta y'Ubushinwa nayo izafata "ingamba za ngombwa zo kwirwanaho."

Urutonde rw'ibicuruzwa birebwa n'iyi misoro mishya ruriho ibicuruzwa birenga ibihumbi 6, birimo ibiribwa, amabuye y'agaciro, ndetse n'ibindi bikoresho birimo nk'ibikapu byo gutwara mu ntoki.

Ibiro bya Perezida Donald Trump w'Amerika biravuga ko iyi misoro iterwa n'ubucuruzi burimo uburiganya bw'Ubushinwa.

Amerika ishaka ko Ubushinwa buhagarika ibikorwa ivuga ko biha icyuho gusangira uburenganzira mu by'umutungo bwite w'umuhanzi - nk'imiterere ndetse n'ibitekerezo ku gukora ibicuruzwa bishya - n'amasosiyete yo mu Bushinwa.

Amerika ivuga ko ibyo birimo nko gusaba ko amasosiyete yo mu mahanga agiye gukorera mu Bushinwa ashyira mu buyobozi bwayo abo mu yandi masosiyete yo mu Bushinwa, kugira ngo aya masosiyete yo mu mahanga abe yakwemererwa gucururiza mu Bushinwa.

Robert Lighthizer uhagarariye Amerika mu by'ubucuruzi, yavuze ko kwihimura k'Ubushinwa "nta shingiro gufite."