Imyigaragambyo yo kwamagana umusoro ku mbuga nkoranyambaga muri Uganda

Abantu babiri batawe mu yombi muri iyi myigaragambyo yari yiganjemo urubyiruko
Image caption Abantu babiri batawe mu yombi muri iyi myigaragambyo yari yiganjemo urubyiruko

Polisi ya Uganda yakoresheje imyuka iryana mu maso inarasa amasasu nyayo mu gutandukanya abigaragambyaga mu murwa mukuru Kampala bamagana umusoro ku bakoresha imbuga nkoranyambaga.

Abantu babiri batawe mu yombi muri iyi myigaragambyo yari yiganjemo urubyiruko.

Byitezwe ko Minisitiri w'intebe wa Uganda azitaba inteko nshinga-mategeko ngo yisobanure ku bijyanye n'uyu musoro.

Iyi myigaragambyo yayobowe ahanini n'abahanzi, abanyamakuru, n'abanyapolitiki, yatangiriye rwagati mu murwa mukuru Kampala - ahiganje ibikorwa by'ubucuruzi no gutwara abagenzi mu modoka.

Icyakuruye benshi mu bakurikiranaga iyi myigaragambyo, ni ukuba Depite Robert Kyagulanyi uzwi cyane nka Bobi Wine na we yayitabiriye.

Mu nteko nshinga-mategeko, yatoye yamagana uyu musoro ku bakoresha imbuga nkoranyambaga.

Uyu musoro uca Abanya Uganda bakoresha imbuga nkoranyambaga nka Facebook na Twitter amasenti 5 y'idolari ry'Amerika.

Depite Kyagulanyi yagize ati:

"Turi kwigaragambya kubera ko uyu musoro udashyize mu gaciro, unyuranyije n'itegeko-nshinga, kandi wibasiye urubyiruko rwa Uganda. Rero ntituzawemera kandi turawamaganye."

Iminota micye nyuma yaho, itsinda ry'abigaragambyaga bahagaritswe na polisi.

Habayeho kubyigana polisi ishaka guta muri yombi Bobi Wine, ariko ntibyayikundira. Yiyatse polisi nuko ahita ava aho imyigaragambyo yaberaga ari kuri moto itwara abagenzi.

Luke Owoyesigire, umuvugizi wa polisi mu mujyi wa Kampala, yavuze ko afite icyizere ko azahata ibibazo Bobi Wine na bamwe mu bandi bigaragambyaga.

Perezida Yoweri Museveni wa Uganda aherutse gushyigikira uyu musoro, avuga ko abakoresha imbuga nkoranyambaga bateza imbere amakompanyi y'itumanaho yo mu mahanga aho guteza imbere ubukungu bwa Uganda.

Abanenga uyu musoro bo bavuga ko ugamije kuniga ubwisanzure, bakanavuga ko urenze amikoro ya benshi mu banya Uganda.