Abahungu barokowe mu buvumo muri Thailande barize bibuka Saman wapfuye agerageza kubarokora

Aba bahungu 12 n'umutoza wabo w'umupira w'amaguru bifotoje bafite igishushanyo cya Saman Gunan, wapfuye agerageza kubarokora Uwufise ububasha kw’isanamu Reuters
Image caption Aba bahungu 12 n'umutoza wabo w'umupira w'amaguru bifotoje bafite igishushanyo cya Saman Gunan, wapfuye agerageza kubarokora

Abahungu 12 bakina umupira w'amaguru barokowe bakurwa mu buvumo muri Thailande bari mu kiriyo cyo kwibuka uwigeze kuba mu gisirikare kabuhariwe cya Thailande kirwanira mu mazi, wapfuye arimo kugerageza kubarokora.

Umukorerabushake kabuhariwe mu kwibira mu mazi, Saman Gunan, yapfuye ku itariki ya 6 y'uku kwezi kwa karindwi ari gushyira amasanduku y'umwuka wo guhumeka wa oxygen mu buvumo aba bahungu bari bahezemo.

Yari afite imyaka 38 y'amavuko.

Kuva icyo gihe afatwa nk'intwari ku isi.

Aba bahungu 12 n'umutoza wabo w'umupira w'amaguru ufite imyaka 25 y'amavuko, ku wa gatandatu nibwo bwa mbere bari babwiye ibya Saman wapfuye ageregeza kubarokora.

Abaganga bari bamaze kwemeza ko ubu noneho bamaze kugarura ubuyanja bihagije kuburyo kumenya iyo nkuru bashobora kubyakira.

Jedsada Chokdamrongsuk, umunyamabanga uhoraho muri minisiteri y'ubuzima muri Thailande wari uhari ubwo babwirwaga iyo nkuru, yagize ati:

"Bose barize, bihanganisha umuryango we bandika ubutumwa ku gishushanyo cya Saman, nuko bafata n'umunota umwe wo kumwibuka."

Amafoto agaragaza aba bahungu bagize ikipe y'umupira w'amaguru the "Wild Boars" - bakiri mu bitaro aho bakomeje gukurikiranwa - bazengurutse icyo gishushanyo cya Saman.

Minisiteri y'ubuzima yavuze ko "banamushimiye ndetse bamwizeza ko bazaba abahungu beza."

Uwufise ububasha kw’isanamu Reuters
Image caption Aba bahungu bakina umupira w'amaguru bunamiye uwapfuye agerageza kubarokora

Aba bahungu, bafite hagati y'imyaka 11 na 17 y'amavuko, bakuwe mu buvumo n'igisirikare kaburhariwe cya Thailande ndetse n'abatabazi mpuzamahanga, mu gikorwa cy'ubutabazi cyamaze iminsi itatu kikarangira ku itariki ya 10 y'uku kwezi kwa karindwi.

Byitezwe ko kuri uyu wa kane ari bwo bazava mu bitaro bya Chiang Rai Prachanukroh aho bakomeje gukurikiranwa, bamwe bakaba bakiri ku miti irwanya za mikorobe.

Ibindi bisa n’ibi