Ubuyapani buri gufata ubushyuhe budasanzwe nk'icyorezo cyugarije igihugu

Abaturage bari gusabwa kwigengesera mu buryo bushoboka bwose birinda ubu bushyuhe bukabije Uwufise ububasha kw’isanamu Getty Images
Image caption Abaturage bari gusabwa kwigengesera mu buryo bushoboka bwose birinda ubu bushyuhe bukabije

Ikigo cy'iteganyagihe mu Buyapani cyatangaje ko ubushyuhe budasanzwe ubu buri gufatwa nk'icyorezo kibasiye iki gihugu.

Abantu 65 ni bo bamaze guhitanwa n'ubu bushyuhe kuva mu cyumweru gishize.

Umuvugizi w'iki kigo yaburiye ko "ubushyuhe buri ku kigero kitari bwigere kibaho" buri kugaragara mu bice bimwe na bimwe by'igihugu.

Abayoboye ibikorwa by'ubutabazi baravuga ko abantu barenga ibihumbi 22 bari mu bitaro kubera indwara y'umuriro ukabije utewe n'ubu bushyuhe budasanzwe, hafi kimwe cya kabiri cyabo bakaba ari abageze mu zabukuru.

Abakora mu bikorwa by'iteganyagihe baravuga ko ntakigaragaza ko ubu bushyuhe bushobora kugabanuka.

Ku wa mbere, umujyi wa Kumagaya wari ufite igipimo cy'umushyuhe kiri kuri dogere 41.1, bukaba ari bwo bushyuhe buri hejuru cyane bubayeho mu mateka y'Ubuyapani.

Rwagati mu murwa mukuru Tokyo, naho hari ubushyuhe bwa dogere 40. Bwari bubaye ubwa mbere ubushyuhe bugeze kuri iki gipimo muri uyu mujyi.

Uwufise ububasha kw’isanamu Getty Images
Image caption Imiryango myinshi mu murwa mukuru Tokyo yagannye ku nkengero y'inyanja mu rwego rwo kugarura ubuyanja

Ikigo cy'iteganyagihe cy'Ubuyapani cyaburiye ko ubushyuhe bwa dogere 35 cyangwa burenzeho buzakomeza kugera mu ntangiriro y'ukwezi gutaha kwa munani.

Abaturage bari kugirwa inama yo kunywa amazi menshi, bagakoresha ibyuma bikonjesha mu nzu kandi bakaruhuka kenshi.

Ubu bushyuhe bwakurikiye imvura nyinshi yateje imyuzure n'ihirima ry'ubutaka bw'imisozi mu burengerazuba bw'Ubuyapani.

Ibindi bisa n’ibi