Perezida Emmerson Mnangagwa wa Zimbabwe aravuga ko atazihanganira akajagari mu matora

Ni ubwa mbere Emmerson Mnangagwa agiye guhatana mu matora

Ahavuye isanamu, Reuters

Insiguro y'isanamu,

Ni ubwa mbere Emmerson Mnangagwa agiye guhatana mu matora

Mu gihe umwuka mubi ukomeje kwiyongera mbere y'amatora ya perezida azaba ku wa mbere, Perezida Emmerson Mnangagwa wa Zimbabwe yaburiye ko atazihanganira akajagari.

Ni amatora azaba abaye aya mbere nyuma yo gukurwa ku butegetsi kwa Robert Mugabe mu kwezi kwa cumi na kumwe k'umwaka ushize wa 2017 - ubutegetsi yamazeho imyaka 37.

Bwana Mnangagwa w'imyaka 75 y'amavuko, avuze aya magambo nyuma yaho polisi iburijemo imyigaragambyo y'abatavuga rumwe n'ubutegetsi yari iteganyijwe kuri uyu wa gatatu mu murwa mukuru Harare yo kwamagana akanama k'amatora.

Polisi yavuze ko ubu iri mu rwinshi mu bikorwa bya nyuma byo kwitegura amatora, kuburyo itari kubona akanya ko kubungabunga umutekano muri iyo myigaragambyo.

Ishyaka rya MDC ry'ingenzi mu yatavuga rumwe n'ubutegetsi ryari ryateguye iyi myigaragambyo mu rwego rwo gusaba ko habaho gukorera mu mucyo birushijeho ku bijyanye n'impapuro z'itora, rivuga ko ibi ari ingenzi kugira ngo amatora azabe mu mucyo no mu bwisanzure.

Ubwo yafataga ijambo muri mitingi y'ishyaka kuri uyu wa kabiri, Bwana Mnangagwa yagize ati:

"Nihagira uteza akajagari, amategeko azitabazwa. Ntituzemera ko habaho akajagari mu gihugu cyacu. Turashaka amahoro."

Amagambo ya Bwana Mnangagwa yafashwe nk'ayari agenewe uwo bahanganye w'ingenzi, Nelson Chamisa.

Bwana Chamisa w'imyaka 40 y'amavuko, yavuze ko abatavuga rumwe n'ubutegetsi "bazahagarika ubuzima mu gihugu" niba amavugurura basaba ko aba mu kanama k'amatora adakozwe.

Hagati aho, Bwana Chamisa yavugiye mu kiganiro n'abanyamakuru kuri uyu wa gatatu ko nubwo hari ibibazo bwose, ishyaka rye ryizeye kwegukana intsinzi.

Nk'urugero, yavuze ko akanama k'amatora kanze guhishura umubare w'impapuro z'itora zizakoreshwa ndetse ntikatangaza ingamba kafashe kugira ngo amatora azabe mu mahoro.

Yavuze ko abatavuga rumwe na leta batazemera ibivuye mu matora "bidafututse", ariko avuga ko yizeye ko bazatsinda amatora nubwo bwose bisa nkaho "amaboko yacu aboheye inyuma."

Yagize ati:

"Tuzatsinda umusifuzi n'umukinnyi bombi" - asa nk'ushaka kuvuga akanama gashinzwe amatora muri Zimbabwe na Bwana Mnangagwa.