Ingagi zo mu misozi muri pariki ya Virunga muri Kongo zibarutse ingore n'ingabo

Ingagi ebyiri zavutse muri pariki y'igihugu izwi cyane ya Virunga muri Repubulika iharanira demokarasi ya Kongo, zikaba zibaye ingangi icyenda zose hamwe zimaze kuvukira muri iyi pariki kugeza ubu muri uyu mwaka.

Ubuyobozi bw'iyi pariki bwatangaje iyi nkuru bubinyujije mu butumwa bwo ku rubuga nkoranyambaga rwa Twitter.

Itangazo ry'ubuyobozi bw'iyi pariki rivuga ko ingagi y'imyaka 19 y'amavuko izwi ku izina rya Kayenga, yibarutse umwana wayo wa gatatu - ingagi y'ingabo.

Ni mu gihe indi ngagi y'imyaka 8 y'amavuko izwi ku izina rya Anangana yo yibarutse umwana wayo wa mbere - ingagi y'ingore.

Ingagi zo mu misozi ni zimwe mu nyamaswa zo ku isi zugarijwe cyane no gushiraho burundu.

Iri tangazo rigira riti:

"Mu myaka 10 ishize, imiryango y'ingagi zo mu misozi yo pariki y'igihugu ya Virunga yagize uruhare rukomeye mu kongera umubare w'ingagi zo mu misozi ku isi, ubu zikaba zigeze ku ngagi 1000."

Ubuyobozi bw'iyi pariki bwongeyeho buti:

"Uku ni ukwiyongera cyane, kuva ku ngagi 790 zariho ku isi mu mwaka wa 2010. Kandi ni byiza cyane kubona iki kiremwa gitangaje ariko kiri mu byibasiwe cyane ku isi, gikomeje kororoka."