Minisitiri w'intebe wa New Zealand yasubiye ku kazi nyuma y'ikiruhuko nk'umubyeyi wabyaye

Minisitiri w'intebe Ardern yatangaje amafoto arimo n'iyi ari kumwe n'umugabo we Clarke Gayford n'umwana wabo w'uruhinja Neve Uwufise ububasha kw’isanamu Getty Images
Image caption Minisitiri w'intebe Ardern yatangaje amafoto arimo n'iyi ari kumwe n'umugabo we Clarke Gayford n'umwana wabo w'uruhinja Neve

Minisitiri w'intebe Jacinda Ardern wa New Zealand yasubiye ku kazi nyuma y'ikiruhuko cy'ibyumweru bitandatu nk'umubyeyi wabyaye.

Madamu Ardern w'imyaka 38 y'amavuko, yibarutse imfura ye mu kwezi kwa gatandatu - ahita aba umutegetsi mukuru wa kabiri ku isi wibarutse akiri ku butegetsi.

Ku wa gatandatu, yafashe amajwi n'amashusho ye mu butumwa bwo ku rubuga nkoranyambaga rwa Facebook avuga ku byo agiye gukora mu cyumweru cya mbere cye asubiye ku kazi nyuma yo kubyara.

Madamu Ardern yagize ati:

"Ngiye kongera nshishikarire akazi."

Mu gihe yari muri konji, Madamu Ardern yari yabaye asigariweho na Winston Peters, Minisitiri w'intebe wungirije wa New Zealand.

Ku itariki ya 21 y'ukwezi kwa gatandatu nibwo yibarutse imfura ye Neve Gayford, amubyara iminsi ine nyuma y'igihe ubundi yari yiteze kubyariraho.

Uwufise ububasha kw’isanamu Reuters
Image caption Madamu Ardern yamaze ibyumweru bitandatu muri konji y'umubyeyi wabyaye

Minisitiri w'intebe Ardern yavuze ko mu gihe cye cya konji y'umubyeyi yakomeje gusoma raporo zijyanye n'imikorere ya leta ndetse akanagishwa inama mbere yuko hafatwa ibyemezo bimwe na bimwe.

Madamu Ardern yatowe mu kwezi kwa cumi k'umwaka ushize wa 2017.

Mu kwezi kwa mbere uyu mwaka, nibwo yatangaje ko we n'umugabo we Clarke Gayford biteguraga ivuka ry'imfura yabo.

Icyo gihe yagize ati:

"Si jye mugore wa mbere ubayeho ufatikanyije imirimo myinshi. Si jye mugore wa mbere ufite akazi kandi nkaba ngiye no kugira umwana - hari abagore benshi babikoze mbere."

Ni we Minisitiri w'intebe ukiri muto mu myaka iki gihugu cya New Zealand kigize kuva mu mwaka wa 1856.

Mu mwaka wa 1990, nyakwigendera Benazir Bhutto yabyaye umwana w'umukobwa ubwo yari Minisitiri w'intebe wa Pakistani. Ni we mutegetsi wa mbere ku isi wo ku rwego rwo hejuru wari ubyaye ari ku butegetsi.