Perezida Mnangagwa arasaba ko habaho ubumwe muri Zimbabwe

Mu kiganiro n'abanyamakuru cyabaye ku wa gatanu, Bwana Mnangagwa mu mvugo ye yagarukaga ku bumwe Uwufise ububasha kw’isanamu Reuters
Image caption Mu kiganiro n'abanyamakuru cyabaye ku wa gatanu, Bwana Mnangagwa mu mvugo ye yagarukaga ku bumwe

Mu gusaba ko habaho ubumwe mu gihugu nyuma y'amakimbirane yakurikiye itangazwa rye nk'uwatsinze amatora, Emmerson Mnangagwa aravuga ko azaba umuyobozi w'Abanyazimbabwe bose.

Perezida Mnangagwa yasabye ko habaho amahoro ndetse anasezeranya ko hazakorwa iperereza ku basirikare ridafite aho ribogamiye nyuma yaho abantu batandatu biciwe mu bikorwa by'urugomo byakurikiye amatora.

Nelson Chamisa, umukuru w'abatavuga rumwe n'ubutegetsi, yavuze ko intsinzi ya Bwana Mnangagwa ari "kudeta (Coup d'État) yakorewe amahitamo [y'abaturage]."

Aya ni yo matora ya mbere abaye kuva Robert Mugabe wategetse Zimbabwe imyaka 37 akuwe ku butegetsi mu mwaka ushize wa 2017.

Mu kiganiro n'abanyamakuru cyabaye ku wa gatanu, Perezida Mnangagwa yavuze ko Bwana Chamisa azagira "uruhare rukomeye muri leta ndetse no muri ejo hazaza ha Zimbabwe."

Yasabye abatavuga rumwe na leta kwifatanya na we mu gusaba ko habaho amahoro n'ubumwe muri Zimbabwe, anavuga ko uburenganzira bw'abaturage buzabungwabungwa.

Uwufise ububasha kw’isanamu Reuters
Image caption Nelson Chamisa w'imyaka 40 y'amavuko, avuga ko gutinda gutangaza ibyavuye mu matora byaciye amarenga ko hari ikitagendaga

Mbere yaho, Bwana Chamisa yari yavuze ko ibyavuye mu matora "byamunzwe na ruswa" ndetse anavuga ko urugaga rw'amashyaka atavuga rumwe n'ubutegetsi rwa MDC, ruzitabaza ubucamanza n'ibyo itegekonshinga riteganya rukaburizamo ibyavuye mu matora.

Bwana Chamisa yongeyeho ko afite ibimenyetso by'ukuntu udusanduku tw'amatora twatwarwaga mu makamyo arangaye bigatuma tuvogerwa.

Yanavuze ko habayeho ukunyuranya mu byatangajwe ko ari byo byavuye mu matora, yongeraho ko indorerezi ye mu matora ku wa kane itemerewe kugenzura ibyavuye mu matora.

Ibindi bisa n’ibi