Leta ya Sudani y'epfo n'inyeshyamba bashyize umukono ku masezerano y'amahoro

Riek Machar na Salva Kiir bashyize umukono kuri aya masezerano mu muhango wabereye mu gihugu gituranyi cya Sudani Uwufise ububasha kw’isanamu AFP
Image caption Riek Machar na Salva Kiir bashyize umukono kuri aya masezerano mu muhango wabereye mu gihugu gituranyi cya Sudani

Leta ya Sudani y'epfo yemeye gusaranganya ubutegetsi n'umutwe w'ingenzi mu mitwe y'inyeshyamba ikorera muri iki gihugu.

Perezida Salva Kiir wa Sudani y'epfo n'umukuru w'inyeshyamba Riek Machar, bashyize umukono kuri aya masezerano bari mu gihugu gituranyi cya Sudani.

Aya masezerano - azatuma Bwana Machar asubira ku butegetsi nk'umwe muri ba Visi-Perezida batanu - agamije kurangiza intambara imaze imyaka itanu muri iki gihugu.

Ni intambara imaze guhitana ababarirwa mu bihumbi amacumi ndetse ikangaza abandi babarirwa muri za miliyoni.

Andi magerageza yabayeho mbere yo kugarura amahoro muri iki gihugu, ntacyo yagezeho.

Al-Dirdiri Mohamed, Minisitiri w'ububanyi n'amahanga wa Sudani wafashije muri aya amaserano mashya, yavuze ko impande zombi zishishikajwe nuko muri Sudani y'epfo hagaruka agahenge.

Ku wa gatanu, Bwana Kiir yavuze ko afite icyizere ko aya amasezerano noneho azagira icyo ageraho kubera ko "twayategetswe" bitandukanye n'uko byagenze mbere.

Yabwiye ibiro ntaramakuru Reuters ati:

"Aya masezerano ntabwo azaburizwamo kandi ndabyizeye neza kubera ko abaturage ba Sudani y'epfo ubu noneho bemeranyijwe ko bagiye guhana amahoro hagati yabo."

Sudani y'epfo yabonye ubwigenge mu mwaka wa 2011. Kuva mu mwaka wa 2013, yatangiye kwibasirwa n'intambara, itsembabwoko n'ayandi mabi.

Amakimbirane yatewe n'ukutumvikana hagati y'ubwoko bw'Abadinka bwa Bwana Kiir n'abo mu bwoko bw'Abanuer bwa Bwana Machar.

Byose byatangiye ubwo Bwana Kiir yirukanaga Bwana Machar wari umwungirije, amushinja kugambirira kumuhirika ku butegetsi. Bwana Machar ahakana iki kirego.

Ibindi bisa n’ibi