Moïse Katumbi yavuze ko atarava ku izima ryo kwiyamamaza mu matora ya perezida muri Kongo

Ku cyumweru, Moïse Katumbi yagiye mu misa muri kiliziya ya Kitwe muri Zambia
Insiguro y'isanamu,

Ku cyumweru, Moïse Katumbi yagiye mu misa muri kiliziya ya Kitwe muri Zambia

Moïse Katumbi, utavuga rumwe n'ubutegetsi bwa Repubulika ya demokarasi ya Kongo, aravuga ko atarava ku izima ryo kwiyamamaza mu matora ya perezida ateganyijwe kuba mu kwezi kwa cumi na kabiri uyu mwaka.

Bwana Katumbi yari yizeye gusubira muri Kongo nyuma yo kumara imyaka ibiri mu buhungiro, ariko abategetsi bamwangiye inshuro ebyiri kwinjira muri iki gihugu, bituma kuri ubu ari mu gihugu gituranyi cya Zambia.

Bivuze ko bishoboka ko hari ubwo atashobora gutanga kandidatire ye ku itariki ntarengwa yo kuri uyu wa gatatu, tariki ya 8 y'uku kwezi kwa munani yashyizweho n'akanama k'amatora muri Kongo.

Bwana Katumbi yabwiye BBC ati:

"Ntabwo ndibuve ku izima. Ni gute ushobora kwangira impunzi gusubira iwabo ngo ubucamanza buyiryoze ibyo iregwa?"

"Babonye ko ibyo banshinja ari ibihimbano. Ni Perezida [Joseph] Kabila uri kubyivangamo kugira ngo simbone uko njya kwiyamamaza mu gihugu cyanjye."

Insiguro y'isanamu,

Ku cyumweru ubwo Moïse Katumbi yari mu misa muri kiliziya ya Kitwe muri Zambia

Bwana Katumbi yakatiwe adahari n'inkiko za Kongo igihano cyo gufungwa amezi 36 nyuma yo kumuhamya icyaha cyo kugurisha mu buryo bunyuranyije n'amategeko umutungo utari uwe. Avuga ko ibyo aregwa ari ibihimbano.

Manda ya Perezida Kabila yarangiye mu kwezi kwa cumi na kabiri k'umwaka wa 2016. Itegekonshinga ntirimwemerera kwiyamamariza manda ya gatatu.

Jean-Pierre Bemba, wigeze kuba Visi-Perezida wa Kongo akaba n'umukuru w'inyeshyamba, we aherutse gutanga kandidatire ye mu matora ya perezida yimirije.

Ni nyuma yaho akuriweho igifungo yari yakatiwe n'urukiko mpuzamahanga mpanabyaha.