Abantu bagera ku bihumbi 10 bahungishijwe umutingito umaze kwica abagera ku 100 muri Indonesia

Abaganga basohoye abarwayi hanze y'ibitaro by'ahitwa i Mataram mu rwego rwo kubarinda kwicwa n'umutingito Uwufise ububasha kw’isanamu AFP
Image caption Abaganga basohoye abarwayi hanze y'ibitaro by'ahitwa i Mataram mu rwego rwo kubarinda kwicwa n'umutingito

Abantu babarirwa mu bihumbi 10 bahungishijwe umutingito w'isi uri ku gipimo cya 6 n'ibice 9 wibasiye ikirwa cya Lombok muri Indonesia ku cyumweru, ukaba umaze guhitana abantu bagera hafi ku 100.

Ababibonye baravuga ko habayeho kugwirirana no kugira ubwoba bwinshi ubwo inyubako zibarirwa mu bihumbi zahirimaga, umuriro w'amashanyarazi ukabura ndetse na telefone ntizongere gukora.

Hoherejwe ubwato bwo guhungisha ba mukerarugendo barenga 1000 bari mu birwa biri hafi aho bya Gili.

Sutopo Purwo Nugroho, umuvugizi w'ikigo cyo guhangana n'ibiza muri Indonesia, yagize ati:

"Abamaze kumenyekana ko bishwe n'uyu mutingito ni 98, bose ni Abanya-Indonesia."

Yongeyeho ati:

"Mu by'ukuri uyu mubare uraza kuza kwiyongera."

Abandi bantu bagera kuri 236 bakomeretse.

Imiryango itanga imfashanyo yatangaje ko ikintu cy'ingenzi ubu ari ugucumbikira abaturage bahiye ubwoba badashobora kuba basubira mu ngo zabo.

Iyi miryango ifasha yongeyeho ko uyu mutingito wo ku cyumweru washegeshe cyane aka gace kurusha uheruka guhitana abantu 16 mu cyumweru gishize.

Perezida Joko Widodo wa Indonesia yasabye ko abagizweho ingaruka n'uyu mutingito bahungishwa byihuse, asaba ko hongerwa umubare w'indege ziri kohererezwa gutabara mu bice byibasiwe.

Ibindi bisa n’ibi