Urugaga rw'amashyaka ari ku butegetsi muri Kongo rwitezwe kugena umukandida uzaruhagararira mu matora

Itegekonshinga risaba ko Perezida Joseph Kabila - uri ku butegetsi kuva mu mwaka wa 2001 - atongera kwiyamamaza Uwufise ububasha kw’isanamu Reuters
Image caption Itegekonshinga risaba ko Perezida Joseph Kabila - uri ku butegetsi kuva mu mwaka wa 2001 - atongera kwiyamamaza

Mu masaha ari imbere, urugaga rw'amashyaka ari ku butegetsi muri Repubulika ya demokarasi ya Kongo rwitezwe kugena umukandida uzaruhagararira mu matora ya perezida ateganyijwe kuba mu kwezi kwa cumi na kabiri uyu mwaka.

Ku wa kabiri, Perezida Joseph Kabila yagiranye inama n'abategetsi bo mu rugaga rw'amashyaka ari ku butegetsi baganira kuri iyi ngingo.

Itegekonshinga ribuza Bwana Kabila - wagombye kuba yaravuye ku butegetsi mu myaka ibiri ishize - kongera kwiyamamaza nubwo we ataravuga ku mugaragaro niba atazongera kwiyamamaza.

Abakandida ku mwanya wa perezida wa Kongo bagomba kugeza kandidatire zabo ku kanama k'amatora bitarenze nyuma ya saa sita kuri uyu wa gatatu.

Abakandida 8 bamaze gutanga kandidatire zabo.

Aba barimo Jean Pierre Bemba wigeze kuba Visi-Perezida wa Kongo akaba n'umukuru w'inyeshyamba, wasubiye mu gihugu mu cyumweru gishize amaze gukurirwaho ibyaha by'intambara n'urukiko mpuzamahanga mpanabyaha.