Kanye West yavuze ko atananiwe gusubiza ikibazo kijyanye na Perezida Trump w'Amerika

West yasuye inyubako ya Trump Tower nyuma yuko Bwana Trump yari amaze gutorwa nka Perezida Uwufise ububasha kw’isanamu Getty Images
Image caption West yasuye inyubako ya Trump Tower nyuma yuko Bwana Trump yari amaze gutorwa nka Perezida

Kanye West yahakanye ko yabuze icyo asubiza ubwo yabazwaga mu kiganiro cyo kuri televiziyo ku bijyanye n'uburyo ashyigikira Perezida Donald Trump wa Leta Zunze Ubumwe z'Amerika.

Uyu muraperi yavuze ko atabonye igihe cyo gusubiza ikibazo yari abajijwe.

West usanzwe akunda kuganira, yagaragaye asa nk'aho amagambo yashize ivuga ubwo umunyamakuru Jimmy Kimmel yamubazaga niba atekereza ko Bwana Trump yita ku birabura "cyangwa abandi bantu abo ari bo bose."

Guceceka kwe ubwo yari abajijwe icyo kibazo muri icyo kiganiro cyabaye ku wa kane, kwatumye umunyamakuru ahita ashyiramo umwanya muto w'akaruhuko w'amatangazo yo kwamamaza.

Ariko ku wa gatandatu West yatangaje ubutumwa ku rubuga nkoranyambaga rwa Twitter, avuga ko "atahawe umwanya wo gusubiza."

Yavuze ko ikibazo yari abajijwe n'umunyamakuru Kimmel cyari "ingenzi cyane" nuko "mfata umwanya wo kugitekerezaho. Nuko njya kumva numva ngo reka tube dufashe umwanya muto w'akaruhuko w'amatangazo yo kwamamaza."

Mu bihe byashize, uyu muraperi mu njyana ya hip-hop w'imyaka 41 y'amavuko, yumvikanye yita Bwana Trump "umuvandimwe" we anavuga ko bateye "kimwe muri kamere" yabo.

Mu kiganiro cyaciye kuri televiziyo mu masaha akuze yo ku wa kane, umunyamakuru Kimmel yagendeye ku magambo yogeye bivugwa ko yavuzwe mu mwaka wa 2005 na Perezida George W Bush avuga ko abirabura ntacyo bamubwiye, nuko abaza West ati:

"Ni iki gituma utekereza ko Donald Trump hari icyo bamubwiye - cyangwa abandi bantu abo ari bo bose?"

West yamaze amasegonda menshi acecetse yibaza kuri icyo kibazo mbere yuko umunyamakuru Kimmel avuga ko byaba byiza babaye bafashe umwanya muto w'akaruhuko.