Perezida Putin w'Uburusiya arataha ubukwe bwa Minisitiri wo muri Autriche

Gutumirwa muri ubu bukwe kwa Bwana Putin ntikuri kuvugwaho rumwe muri Autriche

Ahavuye isanamu, Getty Images

Insiguro y'isanamu,

Gutumirwa muri ubu bukwe kwa Bwana Putin ntikuri kuvugwaho rumwe muri Autriche

Kuri uyu wa gatandatu, Perezida Vladimir Putin w'Uburusiya byitezwe ko aza kugirana ibiganiro n'umukuru w'Ubudage Angela Merkel, ariko mbere yaho arabanza atahe ubukwe mu gihugu cya Autriche.

Mu ntangirio y'iki cyumweru, umuvugizi w'ibiro bya Perezida Putin yemeje aya makuru yuko Bwana Putin aza kuba umushyitsi utunguranye mu bukwe bwa Minisitiri w'ububanyi n'amahanga wa Autriche.

Minisitiri Karin Kneissl arashyingirwa umunyemari Wolfgang Meilinger mu birori bibera mu murima w'imizabibu muri leta ya Styria, imwe muri leta 9 zigize Autriche.

Bwana Putin yatumiwe muri ubu bukwe ubwo yagiriraga urugendo muri iki gihugu mu ntangiriro y'uyu mwaka.

Kneissl, wari umukandida wigenga, yatoranyijwe nka Minisitiri w'ububanyi n'amahanga n'ishyaka ry'abahezanguni rya Freedom Party riri mu rugaga rw'amashyaka ari ku butegetsi muri Autriche.

Inkuru z'ibitangazamakuru byo muri Autriche zikomeje kwibanda ku butumire bwa Bwana Putin muri ubu bukwe kuva byatangazwa mu ntangiriro y'iki cyumweru ko azabwitabira.

Bamwe mu bategetsi batavuga rumwe na leta ya Autriche, bagaragaje impungege ko amafaranga y'imisoro ya rubanda aza kuhatikirira kubera ingamba zo gukaza umutekano muri ibi birori biza kwitabibwa na Bwana Putin.

Abo mu ishyaka rirengera ibidukikije rya Green Party bo muri iki gihugu, ni bamwe mu basabye ko Minisitiri w'ububanyi n'amahanga yegura ku mirimo ye kubera gutumira Bwana Putin.

Byitezwe ko kuri uyu wa gatandatu Bwana Putin aza no kugirana ibiganiro n'umukuru w'Ubudage Angela Merkel, byibanda ku ngingo zitandukanye.

Ubudage buri kotswa igitutu na Leta Zunze Ubumwe z'Amerika ngo buhagarike ibikorwa by'ubwubatsi kuri Nord Stream 2, umushinga ugamije gutwara umwuka wa gas uva mu Burusiya.

Mu kiganiro n'abanyamakuru ku wa gatanu, Madamu Merkel yavuze ko yakwishimira kuganira ku bijyanye na Syria hamwe na bagenzi be bo mu muryango w'ubwirinzi rusange wa NATO uwuriwemo n'ibihugu by'Amerika n'Uburayi.

Ariko yavuze ko "nta byitezwe" kuva mu biganiro byo kuri uyu wa gatandatu agirana na Bwana Putin.

Ahavuye isanamu, AFP

Insiguro y'isanamu,

Bwana Putin ubwo yari ageze mu bukwe muri Autriche