Umutwe wiyita leta ya kisilamu wasohoye "amajwi mashya" byibazwa ko ari ay'umukuru wawo

Abu Bakr al-Baghdadi yatangaje ishingwa rya leta yiyita iya kisilamu ubwo yari mu musigiti wa al-Nuri i Mosul muri Irake mu kwezi kwa karindwi mu mwaka wa 2014

Ahavuye isanamu, AFP

Insiguro y'isanamu,

Abu Bakr al-Baghdadi yatangaje ishingwa rya leta yiyita iya kisilamu ubwo yari mu musigiti wa al-Nuri i Mosul muri Irake mu kwezi kwa karindwi mu mwaka wa 2014

Umutwe wiyita leta ya kisilamu wasohoye "amajwi mashya" yumvikana nkaho ari ay'umukuru wawo Abu Bakr al-Baghdadi.

Ni ubutumwa bwa mbere utanze guhera mu kwezi kwa cyenda k'umwaka ushize wa 2017, bukaba bwumvikana nk'ubugenewe abashyigikiye uyu mutwe.

Nubwo nta tariki yatangajwe ayo "majwi mashya" yasohocyeyeho, bisa nkaho avuga ku bintu byabaye mu bihe byashize bya vuba nk'umupasiteri w'Umunyamerika ufungiye muri Turukiya.

Uyu mutwe wiyita leta ya kisilamu watakaje ikice kinini cy'akarere wagenzuraga.

Mu mwaka ushize wa 2017, wakuwe mu ndiri yawo i Raqqa na Mosul, aho Baghdadi yatangarije ishingwa rya leta yiyita iya kisilamu mu mwaka wa 2014.

Ibiro ntaramakuru Reuters byasubiyemo itangazo rikubiyemo ayo "majwi mashya" rigira ati:

"Ku bamujahidini [abarwanyi b'intambara ntagatifu] ingano yo gutsinda urugamba cyangwa kurutsindwa ntishingirwa ku kuba umujyi wibwe cyangwa ku ufite ubushobozi burenze bwo kurwanira mu kirere, ibisasu bya misile byambukiranya imigabane y'ibihugu cyangwa ibisasu bya bombe bikoranye ubuhanga."

Amerika yashyizeho igihembo cya miliyoni 25 z'amadolari ku muntu wese uzatanga amakuru y'aho Baghdadi aherereye cyangwa akamwica. Inshuro nyinshi byatangajwe ko yakomeretse cyangwa yishwe.

Hagati aho, mu ntangiriro y'uku kwezi icyegeranyo cy'umuryango w'abibumbye cyaburiye ko muri Syria na Irake hakiri abarwanyi w'umutwe wiyita leta ya kisilamu babarirwa hagati y'ibihumbi 20 na 30.