Depite Bobi Wine "yongeye gutabwa muri yombi ashinjwa ubugambanyi"

Museveni, Bobi Wine

Ahavuye isanamu, Getty Images

Insiguro y'isanamu,

Robert Kyagulanyi batazira Bobi Wine igihe yarenguka imbere ya sentare gisirikare i Gulu mu gitondo

Abunganira mu mategeko Depite Bobi Wine - umuhanzi wabaye umunyapolitiki - baravuga ko yongeye gutabwa muri yombi.

Umunyamakuru wa BBC Catherine Byaruhanga uri muri Uganda, yavuze ko Wine yashyizwe mu modoka ya polisi ari kumwe n'umugore we, akajyanwa kuburanira mu rukiko rwa gisivile.

Byabaye hashize amasegonda macye amaze gusohoka mu rukiko rwa gisirikare ruri mu mujyi wa Gulu mu majyaruguru ya Uganda.

Yashyikirijwe urukiko rwa gisivile

Kuri uyu wa kane, Bobi Wine yashyikirijwe urukiko rwa gisivile aho ashinjwa ibyaha by'ubugambanyi. Rwategetse ko we n'abo bafunganye bakomeza gufungwa kugera ku itariki ya 30 y'uku kwezi kwa munani, runategeka ko bemererwa kuvurwa na muganga wigenga bihitiyemo.

Mbere yaho, umwunganizi we mu mategeko, Medard Segona, yari yabwiye urukiko rwa gisirikare ko nubwo yishimiye gukurirwaho ibirego n'urwo rukiko, adashaka ko umukiliya we ashyikirizwa polisi ngo ashinjwe ibindi birego.

Ikinyamakuru The New Vision cya leta ya Uganda cyatangaje ko mbere ubwo Bobi Wine yitabaga urukiko rwa gisirikare, yagaragaye "afite intege nkeya."

Hagati aho, polisi ya Uganda yagose urugo ruri mu murwa mukuru Kampala rwa Dogiteri Kizza Besigye, umunyapolitiki ukomeye utavuga rumwe n'ubutegetsi bw'iki gihugu, imuta muri yombi.

Uku gutabwa muri yombi kwatumye umwuka w'ubushyamirane urushaho kwiyongera muri Uganda.