Ebola imaze guhitana abantu 75 muri Repubulika ya Demokarasi ya Kongo

Indiri y'iyi ndwara ya Ebola iri mu karere k'uburasirazuba bwa Kongo karangwamo umutekano mucye

Ahavuye isanamu, Getty Images

Insiguro y'isanamu,

Indiri y'iyi ndwara ya Ebola iri mu karere k'uburasirazuba bwa Kongo karangwamo umutekano mucye

Minisiteri y'ubuzima muri Repubulika ya Demokarasi ya Kongo ku wa mbere yatangaje ko umubare w'abamaze guhitanwa n'indwara ya Ebola mu burasirazuba bw'iki gihugu umaze kugera ku bantu 75.

Yongeyeho ko "bose hamwe, abantu 111 bamaze kwandura iyi ndwara muri aka gace."

Nkuko bitangazwa n'ibiro ntaramakuru AFP, minisiteri y'ubuzima muri Kongo yavuze ko yabaruye abantu 47 bazize Ebola mu bantu 83 byemejwe ko bayirwaye, kongeraho abandi 28 byibazwa ko nabo ari yo bazize.

Minisiteri y'ubuzima muri Kongo yavuze ko benshi muri abo bayanduye mbere yuko abategetsi batangaza ko Ebola yongeye kwaduka muri iki gihugu ku itariki ya mbere y'uku kwezi kwa munani.

Nta bandi bantu bashya baratangazwa ko banduye Ebola guhera ku cyumweru ubwo umubare w'abo yari imaze guhitana bari abantu 67.

Iyi ndwara ya Ebola yongeye kwaduka muri Kongo, igaragara mu ntara ya Kivu y'amajyaruguru - akarere kiganjemo imitwe y'inyeshyamba.