Urukiko rwo muri Myanmar rwakatiye abanyamakuru ba Reuters

Kyaw Soe Oo (ibumoso) na Wa Lone bavuga ko batezwe umutego na polisi Uwufise ububasha kw’isanamu EPA
Image caption Kyaw Soe Oo (ibumoso) na Wa Lone bavuga ko batezwe umutego na polisi

Urukiko rwo muri Myanmar rwakatiye abanyamakuru babiri b'ibiro ntaramakuru Reuters igifungo cy'imyaka irindwi kubera kurenga ku itegeko rigenga amabanga ya leta mu gihe bakoraga inkuru-perereza ku bwicanyi bwakorewe ba nyamucye bo mu bwoko bw'aba-Rohingya.

Wa Lone w'imyaka 32 y'amavuko na Kyaw Soe Oo w'imyaka 28 y'amavuko, bombi b'Abanya-Myanmar, batawe muri yombi bafite inyandiko za leta bari bamaze guhabwa n'abapolisi.

Bakomeje kuvuga ko ari abere, bakavuga ko batezwe umutego na polisi.

Uru rubanza rwafashwe ahanini nk'ikizamini ku bwigenge bw'itangazamakuru muri Myanmar.

Nyuma y'umwanzuro w'urukiko, Wa Lone yagize ati:

"Nta bwoba mfite. Nta kintu na kimwe kibi nigeze nkora. Nemera ubutabera, demokarasi n'ubwigenge."

Uwufise ububasha kw’isanamu Reuters
Image caption Chit Suu Win, umugore wa Kyaw Soe Oo, yaturitse ararira ubwo yumvaga umwanzuro w'urukiko

Aba bagabo bombi bubatse bakaba bafite n'abana bakiri bato, barafunze kuva batabwa muri yombi mu kwezi kwa cumi na kabiri k'umwaka ushize wa 2017.

Ni iki bakoragaho iperereza?

Begeranyaga ibimenyetso ku bwicanyi bw'abagabo 10 bishwe n'igisirikare mu cyaro cya Inn Din mu majyaruguru ya leta ya Rakhine muri Myanmar mu kwezi kwa cyenda mu mwaka wa 2017.

Batawe muri yombi mbere yuko inkuru yabo itangazwa, bamaze guhabwa inyandiko n'abapolisi babiri bari bahuriye nabo bwa mbere mu nzu yo kuriramo cyangwa resitora.

Uwufise ububasha kw’isanamu Reuters
Image caption Impfu z'aba bagabo ni zo aba banyamakuru ba Reuters bakoragaho iperereza

Umupolisi watanze ubuhamya muri uru rubanza, yavuze ko guhurira muri resitora wari umutego wari watezwe aba banyamakuru.

Mbere yaho, igisirikare cyari cyatangaje iperereza cyakoze ku birego bw'ihohotera muri leta ya Rhakine, iperereza ryagisoneye ko nta kintu na kimwe kibi cyakoze.

Nyuma yaho abategetsi nabo bakoze iperereza ryabo ku bwicanyi bwabereye mu cyaro cya Inn Din, bemeza ko ubwo bwicanyi koko bwabaye ndetse basezeranya ko ababigizemo uruhare bazabiryozwa.

Aba-Rohingya bagera ku bihumbi 700 bamaze guhunga Myanmar guhera mu mwaka ushize wa 2017.