Mu Rwanda bazindukiye mu matora y'abadepite

Bamwe mu bategereje gutorera kuri bimwe mu biro by'itora byo mu ntara y'amajyepfo
Image caption Bamwe mu bategereje gutorera kuri bimwe mu biro by'itora byo mu ntara y'amajyepfo

Mu Rwanda uyu munsi habaye amatora rusange y'abagize inteko ishingamategeko isimbura iherutse guseswa n'umukuru w'igihugu yari ishoje igihe cyayo cy'imyaka 5.

Ku myanya 80 y'abadepite, iyatorewe n'abaturage bose ni 53. Ni amatora uwifuza kuba depite adatorwa ku giti cye iyo yiyamamaza mu izina ry'ishyaka.

Amashyaka yatanze abakandida ni 5 muri rusange, ijwi ry'utora rigahabwa urutonde rw'ishyaka cyangwa se umukandida wigenga ku biyemeje kwiyamamaza ku giti cyabo.

Hari kandi n'amatora y'abadepite 24 bahagarariye abagore ateganyijwe ku munsi w'ejo ku wa kabiri. Aba ntibatorwa mu matora rusange kuko batoranywe n'inzego zihagarariye abagore.

Hari kandi n'abadepite 2 bagomba guhagararira urubyiruko nabo bazatorwa kuri uyu wa kabiri. Aba bakiyongeraho umudepite uhagarariye abafite ubumuga we wamaze kuboneka, akaba ari uwitwa Musolini Eugène.

Aho twashoboye kugera hose twasanze abaturage bazindutse cyane ku buryo mu ma saa tatu ya mu gitondo imirongo yari yatangiye kuba migufiya.

Umwe mu baturage baganiriye na BBC yagize ati:

"Nazindutse kuko nari nzi ko iki gikorwa kindeba kandi ngo nze gushobora gukomeza gahunda zanjye. Rwose ntabwo bimbangamiye."

Image caption Mu nzira zimwe zerecyeza ku biro by'itora hagaragara ibirango biyobora abitabiriye igikorwa cy'amatora

Aya abaye amatora ya 4 y'abadepite kuva ishyaka rya FPR rifashe ubutegetsi mu Rwanda. Ku nshuro zose nta mukandida wigenga washoboye kubona umwanya mu nteko. Kuri ubu abandi bakandida 4 bongeye kugerageza, bose bakaba bavuga ko bafite icyizere cyo gukora ibitarigeze bibaho - bagatsindira umwanya mu nteko.

Ku rutonde rw'amashyaka aharanira imyanya mu nteko, hari iriharanira kurengera ibidukikije rya Green Party ryitabiriye amatora ya kabiri nyuma y'iry'umukuru w'igihugu aho umuyobozi waryo Frank Habineza yari umwe mu bakandida 3 baharaniraga uyu mwanya.

Muri rusange abantu miliyoni 7 ,172,612 ni bo byitezwe ko bitabira aya matora.

Ababa hanze y'u Rwanda bo bakaba baratoye ku munsi w'ejo ku cyumweru.

Ibindi bisa n’ibi