Minisitiri w'ingabo w'Ubutaliyani avuga ko Ubufaransa ari bwo ntandaro y'amakimbirane muri Libiya

Minisitiri Trenta avuga ko Ubufaransa bwashyize imbere inyungu zabwo Uwufise ububasha kw’isanamu Getty Images
Image caption Minisitiri Trenta avuga ko Ubufaransa bwashyize imbere inyungu zabwo

Elisabetta Trenta, Minisitiri w'ingabo mu Butaliyani, yavuze ko ku ruhande rumwe Ubufaransa ari bwo ntandaro y'amakimbirane ari kubera muri Libiya muri iki gihe.

Yabitangarije ku rubuga nkoranyambaga rwa Facebook.

Madamu Trenta yavuze ko ubwo Ubufaransa bwashyiraga umuhate mu bikorwa bya gisirikare by'amahanga muri Libiya mu mwaka wa 2011 mu kurwanya Muammar Gaddafi wategekaga iki gihugu, bwashyize imbere inyungu zabwo bwite kurusha iz'abaturage ba Libiya.

Yavuze ko "Ubufaransa bufite uruhare bwarwo mu biri kubera muri Libiya."

Yongeyeho ko Abanya-Libiya ubwabo ubu ari bo "bo kwirinda ubwabo bakanumvikana hagati yabo", ko amahanga icyo yakora ari ugufasha mu biganiro no mu gutsimbataza inzego za leta ya Libiya.

Yagize ati:

"Twigira ku mateka, buri gihe!"

Ntacyo Ubufaransa burasubiza kuri aya magambo.

Urugaga rw'ibihugu by'amahanga birangajwe imbere na Leta Zunze Ubumwe z'Amerika n'ibihugu bihuriye mu muryango w'ubwirinzi uhuza Amerika n'ibihugu by'Uburayi wa OTAN, byigabye muri Libiya mu mwaka wa 2011 bigendeye ku mwanzuro w'umuryango w'abibumbye byavugwaga ko wari uwo kurinda abaturage.

Ubutaliyani bwemereye ingabo za OTAN gukoresha ibibuga by'indege byabwo, ariko Minisitiri w'intebe w'Ubutaliyani wariho icyo gihe, Silvio Berlusconi, yavuze ko atari ashyigikiye ibyo bikorwa bya gisirikare.