Ishyaka FPR riri ku isonga mu mibare y'agateganyo y'amatora y'abadepite mu Rwanda
Mu karere ka Rulindo ho mu ntara y'amajyaruguru y'u Rwanda, ni hamwe mu ho ishyaka FPR ryiyamamarije
Ishyaka FPR Inkotanyi ni ryo ryegukanye imyanya myinshi mu nteko ishingamategeko mu majwi akiri agateganyo kuko ataratangazwa burundu na Komisiyo y'amatora.
Ku myanya 53 itorerwa mu matora rusange, FPR n'amashyaka matoya yayisunze batsindiye imyanya 40.
Ishyaka ryaje ku mwanya wa 2 ni PSD yatsindiye imyanya 5 naho PL itsindira imyanya 4 mu nteko.
Ibitigiri 5% bisabwa kuwitoza ku gatwe kiwe canke ku mugambwe si icoroshe kuronka
Bwa mbere ishyaka riharanira kurengera ibidukikije Green Party ryinjiye mu nteko ishingamategeko ritsindiye imyanya 2. Umukuru waryo Frank Habineza ni umwe mu badepite bazaba bahagarariye iri shyaka mu nteko.
Ishyaka PS Imberakuri na ryo ryabonye imyanya 2, umukuru waryo Christine Mukabunani akaba ari umwe mu bazarihagararira mu nteko.
Nk'uko byakomeje kugenda mu matora yose yabaye, abakandida bigenga bari biyamamaje ari 4 nta n'umwe washoboye kuzuza amajwi amwinjiza mu nteko.
Amatora muri rusange yararangiye, hakaba hasigaye gusa kumenya abadepite 24 bahagarariye abagore.
Uko bigaragara abagore bagomba kongera kugira ubwiganze mu nteko kuko imibare igaragaza ko bazaba ari abagore 53 ku badepite 80 bagize inteko y'u Rwanda.
Ku munsi wa mbere w'amatora havutse impaka hagati ya Komisiyo itegura amatora n'umwe mu bakandida bigenga.
Bwana Nsengiyumva avuga ko akanama k'amatora kamwise izina ritari ryo
Bwana Nsengiyumva Janvier yashinje Komisiyo y'amatora kumubuza amahirwe yo gutorwa kuko izina rye ryanditswe nabi akitwa Nsengimana ku rupapuro rw'itora.
Nubwo yagiranye ibiganiro na Komisiyo ikemera ko yakoze amakosa, ibyatangajwe byerekanye ko nta cyahindutse ku majwi yari yatangajwe mbere.
