Urukiko rwo muri Sudani y'epfo rwahamije abasirikare ubwicanyi no gufata abagore ku ngufu

Iyi yabaye imwe mu nshuro zidakunze kubaho abasirikare bahamwe no gukora amahano Uwufise ububasha kw’isanamu Reuters
Image caption Iyi yabaye imwe mu nshuro zidakunze kubaho abasirikare bahamwe no gukora amahano

Urukiko rwa gisirikare rwo muri Sudani y'epfo rwakatiye abasirikare 10 ibihano biri hagati y'imyaka 7 no gufungwa burundu nyuma yo guhamwa n'ibyaha byo gufata ku ngufu abakozi b'imiryango ifasha y'amahanga ndetse no kwica umunyamakuru wo muri iki gihugu.

Uru rukiko rwa gisirikare rwanategetse leta ya Sudani y'epfo kuriha buri mugore wafashwe ku ngufu indishyi y'akababaro ingana n'amadolari y'Amerika ibihumbi 4.

Ni ibyaha byakorewe mu kuvundana kwabereye muri hoteli Terrain mu murwa mukuru Juba mu mwaka wa 2016.

Abasirikare babungabunga amahoro b'umuryango w'abibumbye bari hafi aho, bashinjwa kuba barananiwe gutabara ababatabazaga icyo gihe.

Icyumba cy'urukiko rwa gisirikare cyari cyakubise cyuzuye kuri uyu wa kane, kirimo n'abahagarariye ibihugu byabo muri iki gihugu, abakozi bo mu miryango ifasha n'abategetsi ba Sudani y'epfo.

Umwe mu basirikare bashinjwaga yagizwe umwere. Undi we yapfiriye mu buroko azize urupfu rusanzwe.

Umunyamakuru wa BBC Tomi Oladipo ukurikiranira hafi inkuru zijyanye n'umutekano muri Afurika, aravuga ko uru rubanza rwafatwaga nk'ikizamini gikomeye ku butegetsi bwa Sudani y'epfo harebwa niba bufite ubushake bwo guhangana n'umuco wo kudahana n'amahano yakozwe n'ingabo bwite z'iki gihugu.

Igitero cyakorewemo ibyo byaha cyabaye ubwo imirwano hagati y'ingabo za leta n'imitwe y'inyeshyamba yari ikaze mu murwa mukuru Juba.

Abantu barenga 70, barimo n'abasirikare babiri babungabunga amahoro ba ONU, biciwe mu mirwano yamaze iminsi itatu.

Abakozi batanu b'imiryango ifasha y'amahanga bafashwe ku ngufu icyo gihe.

Ibiro ntaramakuru AFP byatangaje ko urukiko rwanategetse leta ya Sudani y'epfo kuriha indishyi zirenga miliyoni 2 z'amadolari y'Amerika Mike Woodward, Umwongereza nyir'iyo hoteli yagabweho igitero.

Icyegeranyo cya ONU kuri icyo gitero cyo kuri iyo hoteli Terrain cyashinje abasirikare babungabunga amahoro ba ONU kunanirwa kuzuza inshingano zabo zo kurinda abaturage b'abasivile.

Ibindi bisa n’ibi