Perezida Mnangagwa wa Zimbabwe yatangaje abagize leta nshya
Ahavuye isanamu, Getty Images
Nta muntu wo mu batavuga rumwe na leta ugaragara muri leta yatangajwe na Bwana Mnangagwa ku wa gatanu
Perezida Emmerson Mnangagwa wa Zimbabwe yatangaje abagize leta nshya igizwe n'abaminisitiri 20, nyuma y'intsinzi ye mu matora ya perezida yabaye ku itariki ya 30 y'ukwezi kwa karindwi uyu mwaka.
Ni leta igabanyije - igizwe n'abaminisitiri 20 bavuye ku baminisitiri 33 bo muri leta icyuye igihe. Nta muntu wo mu batavuga rumwe n'ubutegetsi uri muri iyi leta irimo abaminisitiri bashya 8.
Mthuli Ncube, wahoze ari umukozi wa banki ndetse wigeze no kuba visi-perezida wa banki nyafurika y'iterambere, ni we wagizwe minisitiri w'imari.
Kirsty Coventry, wigeze gutwara umudali w'isi mu koga, we yashinzwe minisiteri y'imikino n'ubugeni.
Bwana Mnangagwa kandi yagize Oppah Muchinguri-Kashiri, umukuru w'ishyaka riri ku butegetsi rya Zanu-PF, minisitiri w'ingabo - umwanya wari uriho Visi-Perezida Constantino Chiwenga mbere yuko aweguraho amaze kuyobora ibikorwa byo guhirika ku butegetsi Robert Mugabe.
Abandi bantu b'ingenzi mu gisirikare bagumye ku myanya yabo muri leta, ni Sibusiso Moyo, minisitiri w'ububanyi n'amahanga, na Perence Shiri, minisitiri w'ubuhinzi.
Abanenga Bwana Mnangagwa bavuga ko iyi leta irimo "amaraso ashaje" menshi cyane kubera abaminisitiri benshi bagumye ku myanya yabo.
Abandi bavuze ko Perezida Mnangagwa agiye guhura n'ikizamini gikomeye cyo gushyira ku munzani ibishoboka n'impinduka z'ako kanya.
