Nelson Chamisa 'arateganya umuhango wo kurahira [nka perezida] by'ikinamico' muri Zimbabwe

Nelson Chamisa Uwufise ububasha kw’isanamu AFP

Umuvugizi wa Nelson Chamisa, umukuru w'abatavuga rumwe n'ubutegetsi muri Zimbabwe, yabwiye ibiro ntaramakuru Reuters ko ashobora kurahira nka perezida by'ikinamico ku wa gatandatu.

Ibiro ntaramakuru Reuters byasubiyemo amagambo y'uyu muvugizi we Nkululeko Sibanda agira ati:

"Tuzakora ikintu cyose kimeze nko kurahira ariko buri kintu cyose tuzakora kizaba gikurikije amategeko."

Energy Mutodi, minisitiri wungirije ushinzwe itangazamakuru muri Zimbabwe, yavuze ko leta y'iki gihugu itakwihanganira "akavuyo."

Ku rubuga nkoranyambaga rwa Twitter, yagize ati:

"Ukugerageza uko ari ko kose guhungabanya leta yemewe n'amategeko ntikuzihanganirwa kandi n'abashaka guteza akavuyo nta mpuhwe bazagirirwa."

Perezida Emmerson Mnangagwa yatangajwe ko yatsinze amatora ya perezida yabaye ku itariki ya 30 y'ukwezi kwa karindwi n'amajwi 50.7% naho Bwana Chamisa atangazwa ko yagize amajwi 44.3%.

Ikirego cya Bwana Chamisa kijyanye n'ibyo avuga ko ari uburiganya bwabaye muri ayo matora, cyaje guteshwa agaciro n'urukiko rw'itegeko-nshinga rwa Zimbabwe.

Ariko yakomeje kuvuga ko yibwe intsinzi muri ayo matora n'akanama k'amatora ka Zimbabwe.

Iyi gahunda yo kurahira by'ikinamico yatumye habaho kugereranya n'ibyabaye muri Kenya aho Raila Odinga, umukuru w'abatavuga rumwe n'ubutegetsi, yakoze irahira nk'iryo mu kwezi kwa mbere.

Yarahiye nka "perezida w'abaturage" imbere y'imbaga y'abamushyigikiye bari bateraniye mu murwa mukuru Nairobi, nyuma y'amatora ya perezida ataravuzweho rumwe yabaye mu mwaka ushize wa 2017.

Bwana Odinga na mucyeba we muri politiki, Perezida Uhuru Kenyatta wa Kenya, nyuma yaho baje gutangaza agahenge bemeranya gukorera hamwe.

Ibindi bisa n’ibi