Zimbabwe yatangije igikorwa kuri interineti cyo gusaba inkunga yo guhangana n'indwara ya kolera

Abategetsi baravuga ko abantu barenga ibihumbi 3 banduye kolera Uwufise ububasha kw’isanamu AFP
Image caption Abategetsi baravuga ko abantu barenga ibihumbi 3 banduye kolera

Zimbabwe yatangije igikorwa cyo gushakisha inkunga binyuze ku rubuga rwa interineti mu guhangana n'indwara ya kolera yadutse muri iki gihugu kuri ubu imaze guhitana abantu 25, benshi mu bapfuye bakaba bari abo mu murwa mukuru Harare.

Mthuli Ncube, minisitiri mushya w'imari wa Zimbabwe, yanyujije ubutumwa ku rubuga nkoranyambaga rwa Twitter asaba inkunga ndetse atanga na nimero ya konti yo muri banki inkunga yanyuzwaho.

Hatangajwe ibihe bidasanzwe muri iki gihugu ndetse n'inama zaciwe i Harare, mu gukumira ko iyi ndwara ikomeza gukwirakwira.

Mu mwaka wa 2008, kolera yadutse muri iki gihugu yishe abantu bagera ku bihumbi 4 mu gihe abagera ku bihumbi 100 bayirwaye icyo gihe.

Icyo gihe yabaye imwe mu ngingo z'ingenzi zatumye Perezida Robert Mugabe wari uriho yemera gusaranganya ubutegetsi n'abatavuga rumwe n'ubutegetsi kuko leta nta mafaranga yari ifite yo guhangana n'iyo ndwara.

Iyi kolera yadutse kuri iyi nshuro, yatangiye kugaragara ku itariki ya 6 y'uku kwezi kwa cyenda nyuma yaho ibizenga by'amazi byari byandujwe n'uburyo bwo kuyobora imyanda yo mu mujyi wa Harare.

Ishami ry'umuryango w'abibumbye ryita ku buzima ryatangaje ko abarwayi ba kolera bo muri Zimbabwe batari koroherezwa n'imiti y'ibanze igabanya ububabare.

Rigira riti:

"Imiti y'iyi ndwara yagombye kugurwa byihutirwa hakimara gushyirwaho uburyo bwo kuyikumira."

Iri shami rya ONU ryita ku buzima ryongeyeho ko iyi ndwara kuri ubu imaze kugera mu ntara eshanu ku ntara 10 zigize Zimbabwe.

Ibiro ntaramakuru Reuters byatangaje ko iyi ndwara ishobora kuba yaratewe nuko ubuyobozi bw'umujyi wa Harare bumaze imyaka irenga 10 burwana no kugeza amazi meza ku batuye mu bice bimwe na bimwe by'inkengero z'umujyi - ibintu byatumye abaturage bamwe bacungira ku mazi yo mu bizenga.

Uwufise ububasha kw’isanamu Getty Images

Abakora mu bikorwa by'ubuzima bari kugira inama abantu gukaraba intoki buri gihe, kunywa gusa amazi meza, kuronga ibiribwa no kubiteka bigashya neza ndetse bakirinda gusuhuzanya bahana umukono.

Ikinyamakuru The Herald cya leta ya Zimbabwe cyatangaje ko hari abatangiye kwitabira igikorwa cyo gufasha, barimo nk'ikigo cy'itumanaho cya Econet Wireless bivugwa ko cyamaze gutanga inkunga ya miliyoni 10 z'amadolari y'Amerika.

Cyatangaje kandi ko n'umuryango utabara imbabare wa Croix-Rouge - ishami ryawo ryo muri Zimbabwe - watanze inkunga y'ibihumbi 250 by'amadolari y'Amerika.

Gusa Abanyazimbabwe bamwe, babinyujije ku mbuga nkoranyambaga, banenze icyo gikorwa cya leta cyo gusaba inkunga.

Umwe muri bo yavuze ko bitumvikana ukuntu ejo ku wa kane abacuruzi b'imodoka bari bari kuzimurika ku nteko ishingamategeko ngo zigurirwe abadepite n'abaminisitiri - ibintu yavuze ko bisobanuye ko igihugu gifite amafaranga - none ubu minisitiri w'imari akaba ari gusaba inkunga yo guhangana na kolera.

Hagati aho, abatavuga rumwe n'ubutegetsi bateganyaga kurahiza by'ikinamico umukuru wabo Nelson Chamisa ku wa gatandatu bavuga ko yibwe intsinzi mu matora ya perezida aheruka, bavuze ko babaye basubitse icyo gikorwa kubera iyi ndwara ya kolera.

Ibindi bisa n’ibi