Bwa mbere mu mateka y'u Rwanda, Umunyarwandakazi Louise Mushikiwabo yatorewe kuyobora Francophonie

Louise Mushikiwabo (iburyo) agiye kuboyobora Francophonie mu myaka ine iri imbere Uwufise ububasha kw’isanamu Getty Images
Image caption Louise Mushikiwabo (iburyo) agiye kuboyobora Francophonie mu myaka ine iri imbere

Bwa mbere mu mateka y'u Rwanda, Umunyarwanda amaze gutorerwa kuba umunyamabanga mukuru wa Francophonie, umuryango uhuza ibihugu bivuga Igifaransa.

Hari ku munsi wa kabiri - ari na wo wa nyuma - w'inama y'uyu muryango washinzwe mu mwaka wa 1970 yaberaga i Erevan mu murwa mukuru wa Armenia.

Madamu Mushikiwabo w'imyaka 57 y'amavuko, yari umukandida w'u Rwanda, ushyigikiwe n'umuryango w'ubumwe bw'Afurika, ndetse n'Ubufaransa.

Canada nayo - igihugu giturukamo Michaëlle Jean bahataniraga uwo mwanya - yari iherutse gutangaza ko itagishyigikiye Madamu Jean.

Icyegeranyo cy'umuryango mpuzamahanga ukurikiranira hafi ururimi rw'Igifaransa, kigaragaza ko abagera kuri miliyoni 300 ku isi bavuga Igifaransa.

Ibiro bya Perezida Paul Kagame w'u Rwanda, bibinyujije ku rubuga nkoranyambaga rwa Twitter, byemeje amakuru y'itorwa rya Madamu Mushikiwabo.

Uwufise ububasha kw’isanamu LUDOVIC MARIN
Image caption Madamu Mushikiwabo w'imyaka 57 y'amavuko, yari umukandida w'u Rwanda, ushyigikiwe n'umuryango w'ubumwe bw'Afurika, ndetse n'Ubufaransa

Igitangazamakuru CBC cya leta ya Canada, cyasubiyemo amagambo y'ibiro bya minisitiri w'intebe wa Canada, Justin Trudeau, nabyo byemeza itorwa rya Madamu Mushikiwabo, bivuga ko ari we wari "uhuriweho".

Mu ijambo rye rya mbere nk'umunyamabanga mukuru wa Francophonie watowe, Madamu Mushikiwabo yagize ati:

"Nshimishijwe cyane n'icyizere mwangaragarije, kandi ndabashimiye mbikuye ku mutima."

Yavuze ko intego ye y'ibanze ari "ugukorera abaturage bacu birushijeho no kugaragara [nka Francophonie] mu ruhando rw'amahanga birushijeho, neza kandi mu mucyo."

Yongeyeho ati:

"Sinje guhindura ibyakorwaga byose uko byakabaye. Nje gusa kugira ngo ngire uko mpindura icyerecyezo ho gato mu buryo bwanjye, namwe mubimfashijemo."

Louise Mushikiwabo ni muntu ki?

Yavutse mu mwaka wa 1961, avukira i Kigali.

Mu bo bavukana, harimo na Lando Ndasingwa wari umunyapolitiki n'umucuruzi ukomeye, akaza kwicwa muri jenoside yo mu Rwanda ku itariki ya 7 y'ukwezi kwa kane mu mwaka wa 1994 n'abandi bamwe bo mu muryango we.

Madamu Mushikiwabo yakuriye i Kigali mu bwana bwe, aho yigiye amashuri abanza n'ayisumbuye, nyuma aza gukomereza muri Kaminuza Nkuru y'u Rwanda i Butare mu mwaka wa 1981.

Nkuko bigaragara ku rubuga rwa interineti ruvuga ku buzima bwe, nyuma yaje gukomereza amasomo muri Leta Zunze Ubumwe z'Amerika kuri Kaminuza ya Delaware aho yize indimi no kuzisemura, ahavana impamyabumenyi y'icyiciro cya gatatu cya kaminuza.

Yabaye muri Amerika imyaka ibarirwa muri 20, aho yaje kuva ajya gukorera banki nyafurika y'iterambere muri Tuniziya, mu buyobozi bushinzwe itangazamakuru.

Avuga adategwa Igifaransa n'Icyongereza - indimi ziyongera ku rurimi kavukire rw'Ikinyarwanda.

Ni we minisitiri urambye ku mirimo ye nka minisitiri w'ububanyi n'amahanga kurusha abandi bose bategetse iyi minisiteri muri leta y'u Rwanda ya nyuma ya jenoside.

Uwufise ububasha kw’isanamu Getty Images
Image caption Amakuru avuga ko Louise Mushikiwabo ari umwe mu baminisitiri bumvikana neza cyane na Perezida Paul Kagame w'u Rwanda

Ni minisitiri w'ububanyi n'amahanga w'u Rwanda kuva mu mwaka wa 2009.

Mbere yaho yabanje kuba minisitiri w'itangazamakuru - minisiteri yaje gukurwaho.

Amakuru avuga ko ari umwe mu baminisitiri bumvikana neza cyane na Perezida Paul Kagame w'u Rwanda.

Bamwe mu banenga leta y'u Rwanda abereye umuvugizi, bayishinja kuniga itangazamakuru ryigenga kandi ntiyihanganire abatavuga rumwe nayo - ibirego leta y'u Rwanda ihakana.

Si byinshi bizwi ku buzima bwe bwite, usibye ko amakuru avuga ko yashakanye n'umugabo w'Umunyamerika.

Ibindi bisa n’ibi