Pierre Kompany, se wa Vincent Kompany, yabaye umuyobozi w'akarere wa mbere w'umwirabura mu Bubiligi

Umuhungu w'icyamamare w'uyu Pierre Kompany avuga ko se yanditse amateka Uwufise ububasha kw’isanamu Getty Images
Image caption Umuhungu w'icyamamare w'uyu Pierre Kompany avuga ko se yanditse amateka

Ububiligi bwatoye umuyobozi w'akarere wa mbere w'umwirabura mu mateka y'iki gihugu - se wa Vincent Kompany, umukinnyi mpuzamahanga w'umupira w'amaguru.

Pierre Kompany yaje imbere mu majwi mu gace ka Ganshoren ko mu murwa mukuru Buruseli, bimuhesha kuba umuyobozi w'akarere.

Bwana Kompany (mukuru) yageze mu Bubiligi mu mwaka wa 1975 nk'impunzi, aturutse mu gihugu kuri ubu kizwi nka Repubulika ya Demokarasi ya Kongo.

Yatangiye kwigaragaza muri politiki y'Ububiligi mu mwaka wa 2006 aba umukuru w'umurenge, nuko mu mwaka wa 2014 aza no kubona umwanya w'umwe mu bahagarariye umujyi wa Buruseli mu nteko inshingamategeko yo ku rwego rw'akarere.

Ariko ashobora kuba azwi cyane ku bw'abahungu be b'ibyamamare.

Uwufise ububasha kw’isanamu Getty Images
Image caption Myugariro Vincent Kompany (iburyo) mu mukino wa Uefa uhuza ibihugu ubwo Ububiligi bwakinaga n'Ubusuwisi i Buruseli ku itariki ya 12 y'uku kwezi kwa cumi

Vincent Kompany, umuhungu we, ni kapiteni w'ikipe ya Manchester City yo muri shampiyona ya Premier League mu Bwongereza kandi agakinira n'ikipe y'igihugu y'Ububiligi.

Umuvandimwe we François, akinira ikipe ya KSV Roeselare yo mu Bubiligi.

Vincent n'umuvandimwe we François, babaye mu ba mbere bashimiye se iyo ntambwe yateye, mu butumwa bwo ku rubuga nkoranyambaga rwa Instagram banyujije kuri konti ya Vincent aho afite abamukurikira miliyoni imwe n'ibihumbi 600.

Vincent yanditse ati:

"Amateka aranditswe! Dutewe ishema nawe papa."

Yavuze ko se abaye "umwirabura wa mbere ubaye umuyobozi w'akarere mu Bubiligi."

Yongeyeho ko "byari byaratinze kuba, ariko ni intambwe itewe."

Si ubwa mbere Vincent avuze ko hakwiye kubaho iterambere muri politiki y'Ububiligi.

Iminsi ibiri mbere yaho, yari yanyujije ubutumwa ku rubuga nkoranyambaga rwa Twitter bugaragaza ifoto y'inteko ishingamategeko y'Ububiligi, nuko yongeraho amagambo agira ati:

"Hari ubucye cyane bw'abantu baturuka mu mico itandukanye."

"Ibyo binagaragaza kuba abantu baturuka mu mico itandukanye batagaragara mu nzego zose z'ubutegetsi mu Bubiligi."