Kongo irasaba Angola ibisobanuro ku baturage bayo babarirwa mu bihumbi birukanwe

Bamwe mu bimukira bashinja polisi ya Angola gukora ibikorwa bihonyanga uburenganzira bwa muntu Uwufise ububasha kw’isanamu SOSTHENE KAMBIDI
Image caption Bamwe mu bimukira bashinja polisi ya Angola gukora ibikorwa bihonyanga uburenganzira bwa muntu

Repubulika ya Demokarasi ya Kongo yahamagaje uhagarariye Angola muri iki gihugu ngo atange ibisobanuro ku baturage bayo babaga muri Angola baherutse kuhirukanwa muri uku kwezi kwa cumi mu bikorwa byo guhashya abacukura amabuye y'agaciro ya diyama mu buryo gakondo.

Bikubiye mu itangazo ryashyizweho umukono na Léonard She Okitundu Lundula, minisitiri w'ububanyi n'amahanga wa Kongo.

Muri iryo tangazo, Bwana Okitundu yagize ati:

"Angola [ikwiye] gukora iperereza ryimbitse ngo hamenyekane nyirabayazana w'ibi bikorwa bidashyize mu gaciro."

Uwufise ububasha kw’isanamu Getty Images
Image caption Angola ivuga ko ibihe aho uwushatse wese yashoboraga kwihigira diyama, byarangiye

Abaturage ba Kongo bahunga Angola - leta ya Kongo ivuga ko ubu bageze mu bihumbi 28 - bavuga ko bahatiwe kuva muri Angola.

Bamwe muri bo bashinja polisi ya Angola gukora ibikorwa bihonyanga uburenganzira bwa muntu.

Antonio Bernardo, umukuru wa polisi ya Angola, ku wa gatatu yahakanye ibyo birego by'ibikorwa by'urugomo, avuga ko amasezerano hagati y'ibihugu byombi ajyanye n'umupaka areba gusa abamara amasaha 48 mu gihugu, nkuko bitangazwa n'ibiro ntaramakuru Reuters.

Uwufise ububasha kw’isanamu AFP/Getty Images
Image caption Bwana Lourenço ari ku butegetsi kuva mu mwaka ushize wa 2017

Mu ijambo Perezida João Lourenço wa Angola ku wa kabiri yagejeje ku nteko ishingamategeko y'iki gihugu, yavuze ko ukwishora mu bikorwa byo gucukura diyama binyuranyije n'amategeko kw'abimukira baba muri Angola mu buryo bunyuranyije n'amategeko bimaze kugera ku kigero giteye impungenge.

Bwana Lourenço yavuze ko kugira ngo Angola igabanye kugira ubukungu bucungira gusa ku musaruro uva mu bikomoka kuri peteroli, ari ngombwa kuvugurura urwego rw'ubucukuzi bw'amabuye y'agaciro.

Yongeyeho ko ibihe aho buri wese yashoboraga kwihigahigira diyama ubu byarangiye.