Amashyaka atavuga rumwe na leta ya Kongo yemeye gutanga umukandida umwe mu matora ya perezida

Jean-Pierre Bemba (iburyo) na Moïse Katumbi (ibumoso) bangiwe kwiyamamaza mu matora ya perezida yimirije Uwufise ububasha kw’isanamu Getty Images
Image caption Jean-Pierre Bemba (iburyo) na Moïse Katumbi (ibumoso) bangiwe kwiyamamaza mu matora ya perezida yimirije

Amashyaka atavuga rumwe n'ubutegetsi muri Repubulika ya Demokarasi ya Kongo avuga ko azatanga umukandida umwe ahuriyeho mu matora ya perezida ateganyijwe ku itariki ya 23 y'ukwezi kwa cumi na kabiri uyu mwaka.

Nyuma y'inama yayahurije muri Afurika y'epfo ku wa kane, amashyaka arindwi yemeranyije ko azatanga umukandida umwe ahuriyeho bitarenze itariki ya 15 y'ukwezi guhata kwa cumi na kumwe.

Abanyamakuru bavuga ko byaba ari igitangaza abakandida b'amashyaka atavuga rumwe n'ubutegetsi bakurikije ibyo bavuga ko bemeranyijweho, bakitoramo umukandida-perezida umwe ubahagarariye.

Aya matora ya perezida yagombye kuba inshuro ya mbere habayeho isimburana ku butegetsi rikozwe mu mahoro muri Kongo.

Byitezwe ko Perezida Joseph Kabila yegura nyuma yo kurangiza manda ebyiri - z'imyaka itanu imwe imwe - ziteganywa n'itegeko-nshinga rya Kongo.

Urugaga rw'amashyaka ari ku butegetsi rwagennye Emmanuel Ramazani Shadary, wahoze ari minisitiri w'ubutegetsi bw'igihugu, nk'umukandida warwo.

Uwufise ububasha kw’isanamu AFP/Getty Images
Image caption Manda ya kabiri - ari na yo ya nyuma - ya Perezida Joseph Kabila wa Kongo yarangiye mu mpera y'umwaka wa 2016

Bwana Kabila yakabaye yareguye mu mwaka wa 2016 ubwo manda ye ya kabiri yarangiraga, ariko isubikwa ry'amatora ryatumye akomeza kuguma ku butegetsi.

Jean-Pierre Bemba na Moïse Katumbi, abakandida babiri b'ingenzi batavuga rumwe n'ubutegetsi, bangiwe kwiyamamaza mu matora yimirije.

Abategetsi ba Kongo bemeye ko imyigaragambyo y'abatavuga rumwe n'ubutegetsi iba kuri uyu wa gatanu mu murwa mukuru Kinshasa.

Ni imyigaragambyo yo kwamagana imashini z'ikoranabuhanga zo gutoresha zitavugwaho rumwe, bamwe bafite ubwoba bw'uko zakoreshwa mu gukora uburiganya mu matora.

Abategetsi b'akanama k'amatora ka Kongo bavuga ko izo mashini zizagabanya amafaranga yo kwifashisha mu bikorwa by'amatora kandi zikarwanya uburiganya.