Byo kwitegura amatora ya perezida, igisirikare cya Kongo cyahaye inkunga y'amakamyo akanama k'amatora

Akanama k'amatora ka Kongo katangaje ko izi modoka zizafasha mu bikorwa by'amatora ya perezida yimirije
Image caption Akanama k'amatora ka Kongo katangaje ko izi modoka zizafasha mu bikorwa by'amatora ya perezida yimirije

Imodoka z'amakamyo za gisirikare ku wa mbere zagaragaye zinyura mu murwa mukuru Kinshasa wa Repubulika ya Demokarasi ya Kongo.

Ariko ntabwo kwari ukugaragaza imbaraga za gisirikare z'iki gihugu.

Ahubwo izo modoka ni imfashanyo igisirikare cy'iki gihugu cyageneye akanama k'amatora, mu gihe hitegurwa amatora ya perezida yo ku itariki ya 23 y'ukwezi kwa cumi na kabiri uyu mwaka.

Akanama k'amatora ka Kongo katangaje ko amakamyo yose hamwe kakiriye nk'inkunga ari amakamyo 300.

Kongeyeho ko kanahawe indege 10 nini n'indege 10 nto za kajugujugu.

Katangaje ko byose bizifashishwa mu kugeza ibikoresho by'amatora - nk'imashini z'ikoranabuhanga zo gutoresha n'ubwiherero bwo gutoreramo - mu bice bitandukanye by'igihugu.

Image caption Urukurikirane rw'amakamyo ya gisirikare yanyuraga mu murwa mukuru Kinshasa ku wa mbere

Mu cyumweru gishize, abashyigikiye abatavuga rumwe n'ubutegetsi bakoze imyigaragambyo i Kinshasa.

Basabaga ko hakoreshwa uburyo busanzwe bw'impapuro z'itora aho gukoresha imashini zo gutoresha mu buryo bw'ikoranabuhanga.

Amatora ya perezida ateganyijwe mu kwezi kwa cumi na kabiri uyu mwaka, ni ayo gusimbuza Perezida Joseph Kabila, wakomeje kuguma ku butegetsi mu gihe cy'imyaka ibiri nyuma yaho manda ye ya kabiri - ari na yo ya nyuma iteganywa n'itegekonshinga - yakagombye kuba yararangiye mu mwaka wa 2016.

Bwana Kabila yageze ku butegetsi mu mwaka wa 2001 nyuma y'iyicwa rya se Laurent-Désiré Kabila wari Perezida wa Kongo.