Umucamanza Jon Tigar wo muri Amerika yahagaritse itegeko-teka rya Perezida Trump ryima ubuhungiro abimukira

Abimukira bari mu itsinda ry'aberekeza muri Amerika, ubwo bari batonze umurongo ngo bahabwe imfashanyo i Mexico, ku itariki ya 19 y'uku kwezi kwa cumi na kumwe Uwufise ububasha kw’isanamu Reuters
Image caption Abimukira bari mu itsinda ry'aberekeza muri Amerika, ubwo bari batonze umurongo ngo bahabwe imfashanyo i Mexico, ku itariki ya 19 y'uku kwezi kwa cumi na kumwe

Umucamanza wo muri Leta Zunze Ubumwe z'Amerika yaburijemo itegeko-teka ryasohowe na Perezida Donald Trump ryima ubuhungiro abimukira bambuka umupaka wo mu majyepfo y'Amerika mu buryo bunyuranyije n'amategeko.

Umucamanza Jon Tigar ukorera muri leta ya San Francisco yasohoye itegeko-teka ryo kuba rihagaritse icyemezo cya Bwana Trump, nyuma yo kumva ingingo zatanzwe n'amashyirahamwe aharanira uburenganzira bwa muntu.

Bwana Trump yashyize umukono kuri iryo tegeko-teka mu ntangiriro y'uku kwezi kwa cumi na kumwe, nk'igisubizo ku itsinda ry'abimukira bagana ku mupaka mu buryo bw'ikivunge.

Yavugaga ko bateye impungenge igihugu, ariko yamaganwe n'amashyirahamwe aharanira uburenganzira bwa muntu yavuze ko yarenze ku mategeko.

Umucamanza Tigar yavuze ko amategeko ariho ubu muri Amerika agaragaza neza ko umunyamahanga uwo ari we wese ugeze muri Amerika "yaba yinjiriye ahantu hagenwe ho kwinjirira cyangwa atariho yinjiriye" ashobora gusaba ubuhungiro.

Yavuze ko itegeko-teka rya Bwana Trump yatangaje ku itariki ya 9 y'uku kwezi kwa cumi na kumwe "rinyuranyije bikomeye" n'ibyari bisanzwe bikorwa mbere.

Umucamanza Tigar yongeyeho ati:

"Uko ububasha bwa perezida bwaba bungana kose, ntabwo yashobora gusubiramo bundi bushya amategeko agenga abinjira n'abasohoka ngo ashyireho itegeko kongere [y'Amerika] yabujije mu buryo bugaragara".

Uwufise ububasha kw’isanamu AFP/Getty
Image caption Abimukira baciye ingando mu mu murwa mukuru wa Mexico ari wo Meixico, mu rugendo rugana ku mupaka w'Amerika

Abimukira babarirwa mu bihumbi bo muri Amerika yo hagati, bamaze ibyumweru berekeza mu majyaruguru ku mupaka w'Amerika na Mexico.

Bavuga ko bahunga ihohoterwa, ubukene n'ibikorwa by'urugomo mu bihugu byabo bya Honduras, Guatemala na El Salvador.

Uwufise ububasha kw’isanamu AFP/Getty
Image caption Perezida Trump yakomeje kurwanya abimukira, yohereza n'ingabo ku mupaka w'Amerika na Mexico

Mu gihe amatora rusange yo muri Amerika yabaye mu ntangiriro y'uku kwezi yari yegereje, Bwana Trump yavuze ko benshi muri abo bimukira ari abanyabyaha, avuga ko icyo kivunge cyabo ari igitero, ndetse ategeka ko ingabo zigabwa ku mupaka.

Bwana Trump yanakomeje kuvuga ko aba bimukira baterwa n'impamvu za politiki.