Leta y'u Rwanda ivuga ko kuganira n'Afurika y'epfo ari ngombwa ariko ngo nta biganiro na Kayumba Nyamwasa

Perezida Paul Kagame w'u Rwanda (ibumoso), Chancelière w'Ubudage, Angela Merkel (hagati) na Cyril Ramaphosa w'Afurika y'epfo (iburyo) Uwufise ububasha kw’isanamu Getty Images
Image caption Perezida Paul Kagame w'u Rwanda (ibumoso) na Cyril Ramaphosa w'Afurika y'epfo (iburyo) ngo bategetse ko ibiganiro biba

Minisitiri w'ububanyi n'amahanga w'u Rwanda, Richard Sezibera, yavuze ko ibiganiro byo kubyutsa umubano w'u Rwanda n'Afurika y'epfo bitaratangira cyakora ngo bigomba kuba hagati y'impande zombi.

Mu kiganiro cya mbere yahaye abanyamakuru kuva ashinzwe ububanyi n'amahanga bw'u Rwanda, Minisitiri Sezibera yavuze ko umubano w'igihugu cye n'Afurika y'epfo impande zombi zifuza ko wazahurwa.

Uyu mubano wajemo igihu nyuma yaho Jenerali Kayumba Nyamwasa ahungiye muri iki gihugu mu mwaka wa 2010, ndetse n'ibikorwa byakurikiyeho byo kugerageza kumwica.

Ikibazo cya Kayumba ntikirimo

Minisitiri Sezibera yavuze ko abakuru b'ibihugu bategetse ko ibiganiro byatangira kandi ashimangira ko biri hafi.

Gusa ngo mu gihe byaba bitangiye ntaho byaba bihuriye n'ikibazo cya Jenerali Kayumba.

Uwufise ububasha kw’isanamu Getty Images
Image caption Minisitiri Sezibera yavuze ko abakuru b'ibihugu bategetse ko ibiganiro byatangira kandi ashimangira ko biri hafi

Yagize ati: "Abakuru b'ibihugu basabye ko twahura tukongera kuzahura umubano. Gusa ibiganiro byacu bizaba hagati y'ibihugu byombi, ntaho bihuriye na Kayumba Nyamwasa cyangwa abandi bahunze igihugu bakurikiranywe n'ubutabera".

Kuganira na P5 byo se?

Ku kibazo cyo kumenya aho u Rwanda ruhagaze ku cyifuzo cy'ibiganiro cyatanzwe n'amashyaka 5 atavuga rumwe n'ubutegetsi yiswe P5, Minisitiri Sezibera yavuze ko ayo mashyaka atazwi.

Yavuze ati: "Amashyaka nzi ni ayanditse mu gihugu, ariko niba hari Umunyarwanda wifuza kuganira ni uburenganzira bwe.

"Bazaze mu mirenge cyangwa se abari muri diaspora bazegere abandi baganire".

Uwufise ububasha kw’isanamu Getty Images
Image caption Umubano w'u Rwanda n'Afurika y'epfo wajemo igihu nyuma yaho Jenerali Kayumba Nyamwasa ahungiye muri iki gihugu mu mwaka wa 2010, ndetse n'ibikorwa byakurikiyeho byo kugerageza kumwica

Ibintu si byiza ku bijyanye n'u Burundi na Uganda

Ku mubano w'u Rwanda n'ibihugu by'akarere, Minisitiri w'ububanyi n'amahanga yavuze ko ibintu bitameze neza cyane hagati y'u Rwanda n'u Burundi ndetse no ku ruhande rwa Uganda.

Gusa nubwo yemera ko umwuka utameze neza, Minisitiri Sezibera ngo asanga impamvu zatumye umubano uzamba zitaraturutse ku ruhande rw'u Rwanda.

Cyakora yavuze ko u Rwanda rwiteguye kwakira uwaza ashaka ko ibintu byasubira mu buryo.

Ibindi bisa n’ibi