Perezida Trump avuga ko kuva mu muryango w'Ubumwe bw'Uburayi k'Ubwongereza, Brexit, kwahungabanya ubucuruzi n'Amerika

Perezida Trump w'Amerika (ibumoso) avuga ko amasezerano ya Theresa May (iburyo), minisitiri w'intebe w'Ubwongereza, yo gukura Ubwongereza mu muryango w'Ubumwe bw'Uburayi yahungabanya ubucuruzi hagati y'ibihugu byombi Uwufise ububasha kw’isanamu Getty Images
Image caption Perezida Trump w'Amerika (ibumoso) avuga ko amasezerano ya Theresa May (iburyo), minisitiri w'intebe w'Ubwongereza, yo gukura Ubwongereza mu muryango w'Ubumwe bw'Uburayi yahungabanya ubucuruzi hagati y'ibihugu byombi

Perezida Donald Trump wa Leta Zunze Ubumwe z'Amerika yavuze ko amasezerano ya Theresa May, minisitiri w'intebe w'Ubwongereza, ajyanye no kwikura mu muryango w'Ubumwe bw'Uburayi azwi nka Brexit, ashobora kubangamira ubucuruzi hagati y'ibihugu byombi.

Bwana Trump yabwiye abanyamakuru ko kwikura muri uwo muryango k'Ubwongereza "bisa nk'ikintu cyiza ku muryango w'Ubumwe bw'Uburayi" ndetse bikaba bivuze ko Ubwongereza bishoboka cyane ko butaba bugishoboye gukorana ubucuruzi n'Amerika.

Ibiro bya Madamu May bizwi nka No 10 byashimangiye ko "bigaragara neza cyane" ko Ubwongereza bwashobora kugirana amasezerano y'ubucuruzi n'ibihugu byo ku isi.

Ibi biro byongeyeho ko Madamu May yiteguye gushyigikira ayo masezerano mu kiganiro mpaka cyo kuri televiziyo kizamuhuza na Jeremy Corbyn, umukuru w'ishyaka ry'abakozi rya Labour.

Uwufise ububasha kw’isanamu Getty Images
Image caption Byitezwe ko Bwana Corbyn, umukuru w'ishyaka ry'abakozi rya Labour, azagirana ikiganiro mpaka kuri televiziyo na Madamu May mu kwezi gutaha, ku masezerano ya Brexit

Byatangajwe ko icyo kiganiro mpaka gishobora kuzaba ku itariki ya 9 y'ukwezi gutaha kwa cumi na kabiri - iminsi ibiri mbere yuko inteko ishingamategeko y'Ubwongereza ifata umwanzuro kuri ayo masezerano ya Madamu May.

Aganira n'abanyamakuru imbere y'ibiro bye bya White House, Bwana Trump yagize ati:

"Kuri ubu, witegereje ayo masezerano, [Ubwongereza] bishoboka ko butazashobora gucuruzanya natwe. Kandi ibyo ntibyaba ari ikintu cyiza. Sintekereza ko ari cyo bifuzaga [Abongereza]".

Bisa nkaho Bwana Trump yashakaga kuvuga ko Brexit yatuma Ubwongereza buba butagishoboye kugirana amasezerano y'ubucuruzi bwo ubwabo n'Amerika.

David Lidington, minisitiri mu biro bya minisitiri w'intebe w'Ubwongereza, yavuze ko amagambo ya Bwana Trump "atari ayari atitezwe".

Bwana Lidington yabwiye ikiganiro Today cya BBC Radio 4 ati:

"Perezida Trump yamye avuga byeruye ati, 'Nshyira Amerika imbere y'ibindi byose'. Rero, niteze ko na minisitiri w'intebe w'Ubwongereza ashyira imbere inyungu z'Ubwongereza".

Bwana Trump yavuze ayo magambo nyuma yaho ku wa mbere Madamu May yibasiwe n'abadepite bijyanye n'amasezerano ya Brexit - ashimangira ko ayo masezerano azatuma Ubwongereza bwisubiza amategeko, amafaranga n'imipaka byabwo.

Hagati aho, ubushakashatsi bwatangajwe na Kaminuza za London School of Economics na King's College zo mu Bwongereza ndetse n'ikigo cyo mu Bwongereza gikora ubushakashatsi ku misoro, bugaragaza ko amasezerano ya Brexit ya Madamu May yagabanya ubukungu bw'Ubwongereza.

Ubu bushakashatsi buvuga ko ubukungu bw'Ubwongereza bwagabanukaho 5.5% mu gihe cy'imyaka 10 iri imbere, kurusha uko byagenda Ubwongereza bugumye mu muryango w'Ubumwe bw'Uburayi.