Cameron Underwood wahawe mu maso h'ahakorano muri Amerika, avuga ko yashoboye kongera kumwenyura

Cameron Underwood Uwufise ububasha kw’isanamu NYU Langone Health

Cameron Underwood avuga ko kuva yahabwa mu maso handi h'ahakorano atakitegerezwa cyangwa ngo ahatwe ibibazo n'abantu atazi.

Uyu mucuzi w'imyaka 26 y'amavuko akaba n'umukanishi, yateweho mu maso h'ahakorano nyuma yo kugerageza kwiyahura bikamupfubana mu mwaka wa 2016.

"Mfite izuru n'umunwa, rero nshobora kongera kumwenyura, kuvuga no kurya ibiryo bikomeye kubikacanga".

Cameron yavuze ayo magambo nyuma yuko hashize imyaka ibiri yirashe agerageza kwiyahura.

Nuko atakaza izuru rye, igice kinini cy'urwasaya rwe rwo hasi ndetse n'amenyo ye yose usibye iryinyo rimwe.

Mu kiganiro n'abanyamakuru cyabereye i New York muri Leta Zunze Ubumwe z'Amerika ku wa kane w'icyumweru gishize, Cameron yagize ati:

"Nishimiye cyane kuba narahawe mu maso handi h'ahaterano kuko bimpa amahirwe ya kabiri mu buzima".

"Nashoboye kongera gukora ibikorwa byinshi nkunda, nko gusohoka, gukina, no kuba hamwe n'inshuti zanjye n'umuryango".

"Nizeye ko vuba aha nzasubira ku kazi kandi ko umunsi umwe nzashaka nkagira umuryango wanjye".

Uwufise ububasha kw’isanamu Underwood family
Image caption Cameron Underwood, iburyo, mu ifoto ari kumwe n'abo mu muryango we ku Bunani bwo mu mwaka wa 2016

Mu kwezi kwa mbere uyu mwaka, abaganga barenga 100 babaze Cameron mu gihe cy'amasaha 25 ku kigo nderabuzima cya NYU Langone kiri i Manhattan muri Amerika, nuko amakuru yuko yamaze koroherwa atangazwa mu cyumweru gishize.

Igikorwa cyo kumubaga cyabaye hashize gusa amezi 18 Cameron agerageje kwiyahura - iki kigo nderabuzima kikaba cyatangaje ko mu mateka y'Amerika, iki ari cyo gihe kigufi cyane kibayeho hagati yo gukomereka no kubagwa.

Kuva umuntu wa mbere yahabwa mu maso h'ahaterano mu mwaka wa 2005, abantu barenga 40 ku isi ni bo bamaze kubagwa bagaterwaho mu maso h'ahakorano.

Dr Eduardo D. Rodriguez wayoboye igikorwa cyo kubaga Cameron, avuga ko nubwo ubuvuzi bukomeje gutera imbere, kuba Cameron ubwe yari ashishikajwe no kurokoka byafashishe mu kugira ngo kubagwa kwe bigende neza.

Agira ati:

"Ku iherezo, byose biterwa n'umurwayi. Cameron yaritanze kandi akora ibisabwa byose".

Guterwaho mu maso h'ahakorano kwa Cameron kwari kubaye ukwa gatatu gukozwe na Dr Rodriguez, kandi avuga ko igihe gito muri rusange Cameron yamaranye ibikomere, ari ikindi kintu gikomeye cyafashije mu koroherwa kwe.

"Cameron ntiyamaze imyaka icumi cyangwa irenga abana n'igikomere cye nkuko bigenda kuri benshi mu bandi bateweho mu maso h'ahakorano".

"Ibyo byatumye ataragize ibibazo by'imibanire n'imitekerereze akenshi bitera agahinda kenshi, gufata ibiyobyabwenge, cyangwa indi myitwarire ishobora kugira ingaruka mbi".

Muri icyo gikorwa cy'ibagwa, umuganga yahaye Cameron urundi rwasaya rwo hasi n'urwo hejuru, ndetse n'amenyo ye yose 32 n'amashinya yayo.

Mu nsi no mu nkanka ho mu mukanwa ke, ibigohe byo hasi n'izuru, byarahinduwe ndetse n'ururimi rwe rwari rucyeneye kongera gukorwa bundi bushya.

Ikigo nderabuzima yabagiwemo kivuga ko icyo gikorwa ari cyo cya mbere gikoreshejwemo ikoranabuhanga ryo ku rwego rwo hejuru cyane mu mateka y'Amerika kandi ko ari cyo cya mbere cyakoreshejwemo uburyo bwa 3D hifashishijwe igikanka cyo mu maso cyatanzwe n'undi muntu.

'Umuhungu wanjye ari gufasha Cameron kugira ubuzima bwiza kurushaho'

Uwufise ububasha kw’isanamu Getty Images
Image caption Cameron Underwood (ibumoso), Eduardo D. Rodriguez (iburyo) na Sally Fisher (hagati), nyina wa Will watanze igikanka cyo mu maso, uvuga ko atari gushobora "kwikuramo urupfu" rw'umuhungu we iyo hatabaho gufasha Cameron

Uwatanze icyo gikanka cyo mu maso ni Will Fisher w'imyaka 23 y'amavuko, umuhanga mu mukino wa chess, wari ufite inzozi zo kuba umwanditsi n'utunganya filime.

Sally, nyina wa Will, agira ati:

"Urupfu rw'umuhungu wanjye rwaranshenguye".

"Nishimiye kuba, mu kubahiriza icyemezo cye, twashoboye guha ubuzima abandi, by'umwihariko ko Will na Dr Rodriguez bahaye Cameron n'umuryango we amahirwe yo kongera kugira inzozi zabo."

"Kuba naragize uruhare muri ibi byambereye isoko y'imbaraga mu gihe gikomeye cyane".

"Sintekereza ko nari gushobora kwikuramo urupfu rwa Will iyo hatabaho gufasha Cameron. Cameron afite ubuzima bwe bwose buri imbere mu maboko ye - kandi nkunze cyane kuba Willie ari kumufasha kugira ubuzima bwiza kurushaho".

Uwufise ububasha kw’isanamu Fisher family
Image caption Mbere yuko apfa, Will yari yariyandikishije ngo ibice bimwe by'umubiri we bizifashishwe mu kuvura abandi

Mu kiganiro n'abanyamakuru cyateguwe n'icyo kigo nderabuzima, Cameron yashimiye cyane Will ndetse n'ubufasha yahawe n'umuryanyo wa Fisher.

Yagize ati:

"Ndashaka ko Sally n'umuryango we bamenya ko jye n'umuryango wanjye tubashimira cyane ku mpano yabo kandi iteka nzahesha icyubahiro umurage wasizwe na Will".

"Habayeho ibikorwa byinshi cyane bitangaje by'iterambere ryo hejuru mu buvuzi bwo kubaga. Ndi ikimenyetso kigaragara cyo kubihamya. Ariko byashobotse gusa kubera abantu badasanzwe nka Will n'umuryango we".