Umubano hagati ya Afurika y'epfo n'u Rwanda wongeye guhungabana, ambasaderi arahamagazwa

Perezida w'u Rwanda Paul Kamage (i bumoso) avugana n'uw'Afrika y'epfo Cyril Ramaphosa (i buryo) na Chanceliere w'Ubudage Angela Merkel abari hagati mu nama ya G20 ku bucuruzi itariki 30/10/2018 Uwufise ububasha kw’isanamu Getty Images
Image caption U Rwanda n'Afurika y'epfo byari biri mu nzira yo kubyutsa umubano

Igihugu cy'Afurika y'epfo cyahamagaje uwugihagarariye mu Rwanda kubera amagambo yo gusebya minisitiri w'ububanyi n'amahanga w'icyo gihugu.

Ndivhuwo Mabaya, umuvugizi wa minisitiri w'ububanyi n'amahanga w'Afurika y'epfo, yabwiye BBC ko leta y'Afurika y'epfo yahamagaje ambasaderi wayo mu Rwanda, George Nkosinathi Twala, kugira ngo bajye inama.

Yanavuze ko yahamagaje n'ambasaderi w'u Rwanda muri Afurika y'epfo, Vincent Karega.

Ndivhuwo Mabaya yavuze ko leta yatangiye ibikorwa byo gusubukura umubano hagati y'ibihugu byombi, ikaba ari imwe mu mpamvu zo guhamagaza ambasaderi wabo mu Rwanda.

Ariko yanavuze ko minisiteri y'ububanyi n'amahanga yababajwe n'amagambo yo gusebanya yanditswe ku mbuga nkoranyambaga n'amagambo yakoreshejwe n'umunyamabanga wa leta muri minisiteri y'ububanyi n'amahanga y'u Rwanda.

Hari amakuru avuga ko ikinyamakuru Rushyashya gitangaza amakuru agaragara nk'abogamiye kuri leta y'u Rwanda, cyari giherutse kwita Lindiwe Sisulu, minisitiri w'ububanyi n'amahanga w'Afurika y'epfo, "inshoreke" ya Kayumba Nyamwasa. Ariko ngo iyo nkuru yaje gusibwa ku rubuga rwa interineti rw'icyo kinyamakuru.

Bwana Mabaya yavuze ko ambasaderi w'u Rwanda muri Afurika y'epfo, Vincent Karega, yahamagajwe maze amenyeshwa akababaro k'Afurika y'epfo.

Yavuze ko amagambo yakoreshejwe n'umutegetsi wo mu Rwanda "atemewe" kandi "agomba guhagarara".

Uwufise ububasha kw’isanamu Getty Images
Image caption Agatotsi hagati y'Afurika y'epfo n'u Rwanda katewe nuko minisitiri w'ububanyi n'amahanga w'Afurika y'epfo, Lindiwe Sisulu, yemereye mu kiganiro n'abanyamakuru ko mu kwezi gushize yabonanye na Kayumba Nyamwasa

Yavuze ko Afurika y'epfo yifuza kugirana umubano mwiza n'u Rwanda ariko bigakorwa hadakoreshejwe gusebanya ku mbuga nkoranyambaga no gukoresha amagambo adakoreshwa mu mibanire y'ibihugu cyangwa diplomasi (diplomacy).

Kubonana na Kayumba Nyamwasa

Agatotsi hagati y'Afurika y'epfo n'u Rwanda katewe nuko minisitiri w'ububanyi n'amahanga w'icyo gihugu, Lindiwe Sisulu, yemereye mu kiganiro n'abanyamakuru ko mu kwezi gushize kwa cumi na kumwe yabonanye na Kayumba Nyamwasa, utavuga rumwe n'ubutegetsi bw'u Rwanda, wahungiye muri icyo gihugu.

Iyo nama ya Kayumba na minisitiri Sisulu yarakaje u Rwanda, bituma Olivier Nduhungirehe, umunyamabanga wa leta muri minisiteri y'ububanyi n'amahanga, yandika ku rubuga nkoranyambaga rwa Twitter amagambo yababaje Afurika y'epfo.

Ntacyo u Rwanda ruravuga kuri icyo kibazo.

Ibindi bisa n’ibi