Al-Shabaab yatangiye kurwanya IS

Abarwanyi ba al-Shabaab Uwufise ububasha kw’isanamu AFP

Umutwe wo muri Somalia wa al-Shabaab ugendera ku matwara akaze y'idini ya Isilamu watangaje ko watangiye kurwanya umutwe wiyita Leta ya Kiyisilamu, IS.

Mu butumwa bwafashwe mu buryo bw'ijwi, umuvugizi w'uwo mutwe Sheikh Ali Rage yasabye abarwanyi bose ba al-Shabaab kugaba ibitero bigamije kuvana abarwanyi ba IS bose muri Somalia.

Nubwo bwose iyi mitwe imaze igihe irwana mu duce tumwe twa Somalia, iyi ni inshuro ya mbere al-Shabaab itangaza ku mugaragaro ko igiye kurwanya IS.

Umuvugizi wa al-Shabaab, Ali Rage, arashinja umutwe wiyita Leta ya Kiyisilamu kubangamira intambara ntagatifu ya Jihad muri Somalia.

Yagereranyije uwo mutwe nka canseri maze ahamagarira abarwanyi ba al-Shabaab gutangira kuwurwanya muri Somalia.

Aya magambo arasa nk'igisubizo k'ubyavuzwe na IS ko yishe abarwanyi ba al-Shabaab muri Puntland.

Uwufise ububasha kw’isanamu SOMALIMEMO
Image caption Al-Shabaab irashinja umutwe wa IS kubangamira intambara ntagatifu ya Jihad muri Somalia

Umutwe wa IS ufite ibirindiro mu majyaruguru ya Somalia kandi hari amakuru avuga ko ubu watangiye gusaba umusanzu abanyasomalia bafite ibikorwa by'ubucuruzi.

Abakurikirana utuntu n'utundi baravuga ko kubona umutwe wa IS uri muri Somalia bishobora kuba byari bibangamiye inyungu za al-Shabaab.

Bikaba rero aribyo byatumye iki cyemezo gifatwa.

Umutwe wa al-Shabaab watangiye kugaba ibitero muri Somalia muri 2006.

Kuva icyo gihe wagabye ibitero bikaze imbere no hanze y'igihugu.

Ibindi bisa n’ibi