Umuririmbyi Chris Brown yarekuwe mu iperereza ku gufata umugore ku ngufu mu Bufaransa

Mu gihe cyashize, uyu muririmbyi yahamwe n'ibyaha by'urugomo Uwufise ububasha kw’isanamu Getty Images
Image caption Mu gihe cyashize, uyu muririmbyi yahamwe n'ibyaha by'urugomo

Polisi y'Ubufaransa yatangaje ko yarekuye umuririmbyi w'Umunyamerika Chris Brown nta cyo aregwa nyuma yo kubazwa bijyanye no gucyekwaho gufata umugore ku ngufu mu murwa mukuru Paris.

Ibiro by'umushinjacyaha w'i Paris byatangaje ko iperereza ku byibazwa ko ari ifatwa ku ngufu ryakorewe uwo mugore rikomeje.

Brown w'imyaka 29 y'amavuko n'abandi bagabo babiri batawe muri yombi ku wa mbere, nyuma yaho umugore w'imyaka 24 y'amavuko atanze ikirego ko yahohotewe muri hoteli y'i Paris mu ntangiriro y'uku kwezi kwa mbere.

Nyuma yo kurekurwa, Brown yifashishije imbuga nkoranyambaga avuga ko nta kibi yakoze.

Kuri Instagram, yagize ati: "Ndashaka ko byumvikana neza, ibi ni ibihimbano". Ni ubutumwa bwarecyejwe n'ifoto yashyizeho amagambo ayisobanura agira ati: "Iyi ndaya irabeshya".

Yongeyeho ko ibyo yacyekwagaho binyuranye na kamere ye n'imyitwarire myiza.

Raphael Chiche, wunganira mu mategeko Brown, yavuze ko uyu muririmbyi mu njyana ya R&B yagaragaje "ashize amanga" ko ari umwere kandi ko ateganya kuregera indishyi kubera guharabikwa.

Amakuru avuga ko abandi bagabo babiri bari batawe muri yombi hamwe na Brown - ibitangazamakuru byo mu Bufaransa byatangaje ko ari ucunga umutekano we naho undi akaba inshuti ye - na bo bamaze kurekurwa.

Icyo cyibazwa ko ari ifatwa ku ngufu, bivugwa ko ryabereye kuri hoteli ihenze ya Mandarin Oriental ku itariki ya 15 y'uku kwezi kwa mbere.

Ubu si ubwa mbere Brown agonganye n'amategeko - hari izindi nshuro yahamwe n'ibyaha by'urugomo yakoreye abantu b'ibyamamare.

Mu mwaka wa 2009, yabaye afunguwe mu gihe cy'imyaka itanu kubera kwitwara neza muri gereza ndetse ategekwa gukora imirimo nsimburagifungo nyuma yo gukubitira mu modoka ye Rihanna wahoze ari umukunzi we.

Mu mwaka wa 2016, yatawe muri yombi acyekwaho gukubita akoresheje intwaro yica nyuma yaho umugore abwiriye polisi ko yamushyize ku nkeke amukangisha imbunda.

Nyuma yaje kurekurwa, nuko umwunganizi we mu mategeko avuga ko ibyo umukiliya we yaregwaga "byagaragaraga ko ari ibihimbano".