Igitero cy'igisasu cyahitanye abantu 20 kuri kiliziya y'ahitwa Jolo muri Philippines

Iki gitero cyangije bikomeye inyubako y'iyi kiliziya y'i Jolo Uwufise ububasha kw’isanamu AFP/Getty Images
Image caption Iki gitero cyangije bikomeye inyubako y'iyi kiliziya y'i Jolo

Abategetsi bavuga ko igitero cy'ibisasu bibiri kuri kiliziya yo mu karere k'amajyepfo ya Philippines cyahitanye abantu 20 naho abandi babarirwa mu macumi barakomereka.

Igisasu cya mbere cyaturitse ubwo harimo hasomwa misa kuri iki cyumweru kuri kiliziya nkuru (cathédrale) yo ku kirwa cya Jolo, akarere gakorerwamo n'intagondwa zigendera ku mahame akaze y'idini ya kisilamu.

Mu gihe abasirikare batabaraga, hahise haturitswa igisasu cya kabiri giturikirijwe aho imodoka ziparikwa.

Iki gitero kibaye hashize iminsi akarere kiganjemo abo mu idini ya kisilamu muri iki gice, batoreye muri kamarampaka basaba ubwigenge bwinshi kurushaho.

Nta mutwe wari wigamba kugaba iki gitero. Ikirwa cya Jolo kimaze igihe ari icyicaro cy'umutwe w'intagondwa zigendera ku mahame akaze y'idini ya kisilamu, zirimo n'izo mu mutwe witwa Abu Sayyaf.

Igisasu cya mbere cyaturitse ku isaha ya saa mbiri n'iminota 45 za mu gitondo ku isaha yo muri Philippines, kuri kiliziya nkuru yitiriwe Our Lady of Mount Carmel, yibasiwe n'ibitero by'ibisasu mu gihe cyashize.

Igisasu cya kabiri cyaturitse nyuma yaho gato, mu muryango wa kiliziya.

Benshi mu bishwe ni abaturage b'abasivile.

Uwufise ububasha kw’isanamu EPA
Image caption Abasirikare bahise bagabwa aho icyo gitero cyabereye

Amashusho yashyizwe ku mbuga nkoranyambaga, agaragaza umuhanda munini werekeza kuri iyi kiliziya wafunzwe n'abasirikare bakoresheje ibimodoka bivugwa ko bitamenwa n'amasasu.

Bamwe mu bakomeretse bajyanwe n'indege mu mujyi uri hafi aho wa Zamboanga.

Delfin Lorenzana, minisitiri w'ingabo wa Philippines, yavuze ko iki ari "igikorwa cya kinyamaswa", ashishikariza abaturage gukorana n'abategetsi mu "kwanga ko iterabwoba ryagera ku ntsinzi iyo ari yo yose".

Yagize ati: "Tuzakoresha ibiteganywa n'amategeko byose ngo abakoze ibi babiryozwe".

Mu cyumweru gishize, abatora bemeje ishingwa ry'akarere kigenga ka Bangsamoro kari mu turere twiganjemo abo mu idini ya kisilamu mu majyepfo ya Philippines.

Ariko abatora bo mu ntara ya Sulu, aho iyi kiliziya iherereye, batoye babyamagana.

Ayo matora ya kamarampaka yabaye nyuma y'amasezerano y'amahoro yashyizweho umukono hagati ya leta ya Philippines n'umutwe ugendera ku mahame akaze y'idini ya kisilamu witwa Moro Islamic Liberation Front.

Mbere yaho, abategetsi bari bavuze ko bafite icyizere ko ayo matora yaba igisubizo cya politiki mu kugerageza kurangiza imyaka ibarirwa mu macumi y'imirwano hagati y'igisirikare n'intagondwa zigendera ku mahame akaze y'idini ya kisilamu zishaka kwigenga, muri iki gihugu kiganjemo abo mu idini gatolika.

Abantu barenga ibihumbi 120 bamaze kugwa muri iyo mirwano.

Ibindi bisa n’ibi