Umuryango ushamikiye kuri kiliziya gatolika muri Kongo wahagaritse imyigaragambyo yamagana Perezida Tshisekedi

Kiliziya gatolika yo muri Kongo, bitangazwa ko yari ifite indorerezi zigera ku bihumbi 40, yemeza ko Félix Tshisekedi atatsinze amatora Uwufise ububasha kw’isanamu AFP/Getty Images
Image caption Kiliziya gatolika yo muri Kongo, bitangazwa ko yari ifite indorerezi zigera ku bihumbi 40, yemeza ko Félix Tshisekedi atatsinze amatora

Umuryango uvuga rikumvikana wo muri Repubulika ya Demokarasi ya Kongo wari wamaganye amatora ya perezida uvuga ko yabayemo uburiganya, utangaza ko utazongera gukoresha indi myigaragambyo yo kwamagana ibyayavuyemo.

Ni amatora yabaye ku itariki ya 30 y'ukwezi kwa cumi na kabiri k'umwaka ushize wa 2018.

Ihuriro ry'abayobozi b'abalayiki bo muri kiliziya gatolika, rizwi nka CLC mu magambo ahinnye y'Igifaransa, ryatangarije BBC ko nyuma yo kurahira kwa Félix Tshisekedi nka Perezida mushya w'iki gihugu, ritazahamagaza imyigaragambyo imurwanya.

Martin Fayulu, umwe mu batavuga rumwe na Bwana Tshisekedi, ashimangira ko amatora aheruka yabayemo uburiganya.

Ariko abanyamakuru bavuga ko bizamugora gushyira hamwe abamushyigikiye mu gihe adashyigikiwe na kiliziya gatolika.

CLC yagize uruhare rukomeye mu guhamagaza imyigaragambyo yo kwamagana Joseph Kabila wahoze ari Perezida, wavuye ku butegetsi yari amazeho imyaka 18.

Yabaye inshuro ya mbere habayeho isimburana ku butegetsi ribaye mu mahoro kuva iki gihugu - cyakolonijwe n'Ububiligi - cyabona ubwigenge mu mwaka wa 1960.