Ububiligi bwemeye kwakira Laurent Gbagbo wabaye Perezida wa Côte d'Ivoire, wagizwe umwere na ICC

Laurent Gbagbo w'imyaka 73 y'amavuko, yashinjwaga ibyaha byibasira inyoko-muntu Uwufise ububasha kw’isanamu AFP/Getty Images
Image caption Laurent Gbagbo w'imyaka 73 y'amavuko, yashinjwaga ibyaha byibasira inyoko-muntu

Ububiligi bwemeye kwakira Laurent Gbagbo wahoze ari Perezida wa Côte d'Ivoire, nyuma yaho agiriwe umwere n'urukiko mpuzamahanga mpanabyaha, ICC, rufite icyicaro i La Haye (The Hague) mu Buholandi.

Bijyanye no kurekurwa kwe ariko gufite amabwiriza, Bwana Gbagbo ntabwo azaba yemerewe kurenga imbibi z'Ububiligi, mu gihe hategerejwe kumvwa ubujurire ku kugirwa umwere kwe.

Yabaye umuntu wa mbere wahoze ari umukuru w'igihugu uburanishijwe na ICC.

Yashinjwaga ibyaha byibasira inyoko-muntu bifitanye isano n'ibikorwa by'urugomo byakurikiye amatora ya perezida yabayemo imvururu yo mu mwaka wa 2010, yaguyemo abantu 3000 naho abandi ibihumbi 500 bagata izabo.

Yahakanye ibyo aregwa, avuga ko bishingiye ku mpamvu za politiki.

Bwana Gbagbo yafashwe n'abasirikare bashyigikiwe n'umuryango w'abibumbye n'Ubufaransa b'uwo bari bahanganye Alassane Ouattara - Perezida wa Côte d'Ivoire kuri ubu, ari mu mpoma yubatse mu ngoro ya perezida, hari mu mwaka wa 2011.

Mu kwezi gushize kwa mbere, abacamanza ba ICC bemeje ko nta cyaha kimuhama, bategeka ko ahita arekurwa.

Yemerewe gusubira iwe mu rugo muri Côte d'Ivoire?

Abashinjacyaha barajuriye, bavuga ko Bwana Gbagbo ashobora guhita atoroka ubucamanza kandi ko ashobora kutagaruka i La Haye mu rubanza rw'ubujurire.

Icyemezo cy'urugereko rw'ubujurire rwa ICC cyashyizwe ahagaragara ku wa gatanu w'iki cyumweru, kigaragaza amabwiriza Bwana Gbagbo agomba gukurikiza.

Harimo ko agomba gutanga urwandiko rwe rw'abajya mu mahanga akaruha urukiko, ko agomba gusaba uruhushya urukiko mu gihe yaba ashatse kurenga imbibi z'umujyi wo mu gihugu cyamwakiriye, kandi ko atemerewe kugira ibyo atangaza bijyanye n'uru rubanza.

Umuvugizi wa ICC yabwiye BBC ko atakwemeza niba Bwana Gbagbo yamaze kuva muri gereza ya ICC.

Umuvugizi wa minisiteri y'ububanyi n'amahanga y'Ububiligi, yavuze ko atazi niba uyu wahoze ari perezida yamaze kugera muri iki gihugu.