ONU itangaza ko indwara y'iseru imaze guhitana abana barenga 100 muri Kongo muri uyu mwaka

Umwana w'umukobwa na murumuna we bakingirwa iseru mu nkambi ya Dubie mu ntara ya Katanga, ku itariki ya 8 y'ukwezi kwa cumi na kabiri mu mwaka wa 2005 Uwufise ububasha kw’isanamu Getty Images
Image caption Umwana w'umukobwa na murumuna we bakingirwa iseru mu nkambi ya Dubie mu ntara ya Katanga, ku itariki ya 8 y'ukwezi kwa cumi na kabiri mu mwaka wa 2005

Umuryango w'abibumbye ku wa gatatu watangaje ko abana barenga 100 bamaze guhitanwa n'indwara y'iseru (cyangwa agasama mu Kirundi) muri Repubulika ya Demokarasi ya Kongo kuva uyu mwaka wa 2019 watangira, indwara ije yiyongera ku byorezo bya cholera na Ebola muri iki gihugu.

Ubutumwa bwo kubungabunga amahoro bw'umuryango w'abibumbye muri Kongo, MONUSCO, butangaza ko abategetsi bo mu rwego rw'ubuzima bo mu ntara zo mu majyepfo ashyira uburasirazuba za Lualaba na Lomami basanze abantu 7175 barwaye iseru mu kwezi gushize kwa mbere.

Muri bo, "abagera ku 137 barapfuye".

Nkuko bitangazwa n'ibiro ntaramakuru AFP, MONUSCO yavuze ko abarenga 80% by'abo bapfuye ari abana, bari munsi y'imyaka itanu y'amavuko.

Impuguke zivuga ko iyi ndwara y'iseru yatewe n'ibura ry'inkingo, amavuriro adafite ibikoresho bihagije ndetse n'imirire mibi y'urubyiruko.

MONUSCO yongeyeho ko hamaze no kugaragara abantu 1936 barwaye cholera i Katanga, Lomami na Tanganyika, kuva uyu mwaka watangira

Yavuze ko ibura ry'amazi meza yo kunywa, ibikorwa by'isukura n'ubuvuzi, biri gukoma mu nkokora urugamba rwo guhangana n'iyi ndwara ya cholera.

Icyegeranyo cya MONUSCO kigira kiti: "Ntabwo tuvuga cyane kuri ibi byorezo bibiri, [kandi] nabyo birahangayicyishije cyane kandi birica".

Mu mpera y'icyumweru gishize, leta ya Kongo yatangaje ko abantu barenga 500 bamaze guhitanwa na Ebola kuva yakwaduka mu ntara za Kivu y'amajyaruguru na Ituri mu burasirazuba bw'igihugu harangwa umutekano mucye, mu kwezi kwa munani k'umwaka ushize wa 2018.

Umutekano mucye urangwa muri aka gace kamaze imyaka gashegeshwa n'imitwe y'inyeshyamba, watumye ibikorwa byo kuyirwanya bitihuta.