Habura amasaha ngo atangire, Nigeria yasubitse amatora ya perezida ho icyumweru

Mahmood Yakubu, umukuru w'akanama k'amatora ka Nigeria, atangaza iki cyemezo cyo gusubika amatora ya perezida n'ayabagize inteko inshingamategeko Uwufise ububasha kw’isanamu Getty Images
Image caption Mahmood Yakubu, umukuru w'akanama k'amatora ka Nigeria, atangaza iki cyemezo cyo gusubika amatora ya perezida n'ayabagize inteko inshingamategeko

Akanama k'amatora ka Nigeria katangaje ko amatora ya perezida n'ay'abagize inteko ishingamategeko yari ateganyijwe kuri uyu wa gatandatu yasubitsweho icyumweru.

Aka kanama katangaje ibi habura amasaha atanu gusa ngo aya matora atangire.

Mahmood Yakubu, ukuriye aka kanama, yagize ati: "Gukora amatora nkuko byari biteganyijwe ntabwo bigikunze".

Yavuze ko icyemezo gikomeye cyo kuyasubika cyagombaga gufatwa kugira ngo hazabe amatora arimo ubwisanzure kandi akozwe mu mucyo.

Yavuze ko aya matora ya perezida n'ay'abagize inteko ishingamategeko, yimuriwe ku wa gatandatu ku itariki ya 23 y'uku kwezi kwa kabiri.

Amatora y'abakuru b'intara, inteko nshingamategeko zo muri za leta zigize iki gihugu ndetse n'ay'abagize inama njyanama zo muri izi leta, yo yimuriwe ku wa gatandatu ku itariki ya 9 y'ukwezi gutaha kwa gatatu.

Aya matora yasubitswe nyuma y'inama y'igitaraganya yabereye ku cyicaro cy'aka kanama mu murwa mukuru Abuja.

Byakiriwe gute?

Amashyaka abiri ya politiki y'ingenzi yo muri iki gihugu - iriri ku butegetsi rya All Progressives Congress n'iritavuga rumwe n'ubutegetsi rya People's Democratic Party - yahise yamaganira kure iri subikwa, ashinjanya ko buri rimwe muri yo rishaka gukora uburiganya mu matora.

Uwufise ububasha kw’isanamu Getty Images
Image caption Atiku Abubakar (iburyo) w'imyaka 72 y'amavuko na Perezida Muhammadu Buhari (ibumoso) w'imyaka 76 y'amavuko, ni bo bahabwa amahirwe menshi mu bakandida 73 bari guhatana

Benshi bari bamaze kugenda ibirometero n'ibirometero bajya gutora.

Image caption Musa Abubakar avuga ko yakoze urugendo rw'ibirometero 550 agiye gutora agatungurwa no kumenya ko amatora yasubitswe

Mu mujyi wa Daura wo mu majyaruguru y'igihugu, Musa Abubakar wakoze urugendo rw'ibirometero 550 avuye mu murwa mukuru Abuja ngo ajye gutora, yabwiye BBC ko "atiyumvisha" ibyabaye.

Image caption Abanyanigeria nka Hajiya Sa'adatu bamenye gusa inkuru y'isubikwa ry'amatora ubwo babyukaga

Hajiya Sa'adatu yavuze ko "ababajwe cyane" no kumenya inkuru yo gusubikwa kw'amatora, mu gihe yari yamaze kwitegura ngo ajye gutorera mu mujyi wa Kano wo mu majyaruguru y'igihugu.

Ariko hari abandi bavuze ko kuba amatora yasubitswe bivuze ko nta rundi rwitwazo akanama k'amatora kagira mu gihe yaba atagenze neza mu cyumweru gitaha.

Michael Momodu, wo muri leta ya Delta mu majyepfo ashyira uburasirazuba, yavuze ko agifite icyizere ko "ibyiza biri imbere" kandi ko "Imana izabisohoza".

Kuki amatora yasubitswe?

Atangaza icyo cyemezo cyo gusubika amatora, Bwana Yakubu yavuze ko cyafashwe nyuma yo "gusuzumana ubushishozi" ibijyanye na "gahunda y'imigendekere" y'amatora.

Yongeyeho ko hari "umuhate wo gukora amatora mu bwisanzure, aboneye kandi yo kwizerwa".

Yavuze ko iri subikwa ry'amatora ari ngombwa kugira ngo akanama ayoboye kabone igihe cyo gucyemura ibibazo by'ingenzi no gutuma "amatora akomeza kugira ireme", ariko nta bisobanuro birenzeho yatanze.

Mu byumweru bibiri bishize, ibiro byinshi by'akanama k'amatora ka Nigeria byaratwitswe, ibikoresho by'itora by'ikoranabuhanga birimo n'amakarita y'itora bibarirwa mu bihumbi birakongoka.

Hakomeje no kumvikana amakuru y'ibura ry'ibikoresho by'itora muri zimwe muri leta 36 zigize iki gihugu.

Nigeria yaba yarigeze isubika amatora mbere yaho?

Yego.

Ikibazo cyo gusubika amatora si gishya muri Nigeria - amatora yabanje yo mu myaka ya 2011 na 2015 yasubitswe iminsi.

Mu mwaka wa 2015, leta yategetse ko imipaka yo ku butaka no mu mazi ifungwa mbere yuko amatora yari arimo ihatana rikomeye aba, mu gihe hari amakuru yuko hari abanyamahanga bateganyaga kwambuka bagiye gutora muri Nigeria.

Muri uwo mwaka, umwe mu bakandida yarapfuye mu gihe amajwi yabarurwaga.

Ibindi bisa n’ibi