Juan Guaidó yatangaje igishobora kuvamo ubushyamirane ku mfashanyo Amerika yageneye Venezuela

Imfashanyo yapakururiwe muri Colombia ivanywe mu ndege za gisirikare z'Amerika, nuko itwarwa mu modoka yerekezwa ku mupaka na Venezuela Uwufise ububasha kw’isanamu AFP
Image caption Imfashanyo yapakururiwe muri Colombia ivanywe mu ndege za gisirikare z'Amerika, nuko itwarwa mu modoka yerekezwa ku mupaka na Venezuela

Juan Guaidó witangaje nka perezida w'inzibacyuho wa Venezuela, yatangaje igishobora kuvamo ubushyamirane bushingiye ku mfashanyo ya Leta Zunze Ubumwe z'Amerika igenewe Venezuela asaba ko abaturage b'iki gihugu bambuka imipaka bakayinjiza mu gihugu.

Indege za gisirikare z'Amerika zikomeje kugeza imfashanyo igenewe Venezuela mu mujyi wa Cucuta wo muri Colombia uri ku mupaka n'iki gihugu.

Bwana Guaidó avuga ko ashaka "imfashanyo ku bwinshi" kandi ko ashaka ko "ikivunge cy'abantu" berekeza ku mipaka bakajya gufata iyo mfashanyo ku wa gatandatu w'icyumweru gitaha.

Amerika itangaza ko iyi mfashanyo iri gutundwa aha mu mujyi wa Cucuta ku busabe bwa Juan Guaidó, umukuru w'abatavuga rumwe n'ubutegetsi bwa Venezuela witangaje ko ari we perezida w'inzibacyuho w'iki gihugu mu kwezi gushize kwa mbere.

Perezida Nicolás Maduro wa Venezuela avuga ko iyi mfashanyo ijyanye n'umugambi mubisha w'Amerika wo kwiyoberanya mu kubona uburyo bwo kugaba igitero muri Venezuela.

Biracyari urujijo niba iyi mfashanyo izemererwa kwinjira muri Venezuela.

Mbere yaho, Bwana Guaidó yari yavuze ko abakorerabushake bo muri Venezuela bagera ku bihumbi 600 bazikorera iyi mfashanyo bakayambutsa umupaka bayijyana muri Venezuela, ku itariki ya 23 y'uku kwezi kwa kabiri.

Uwufise ububasha kw’isanamu AFP
Image caption Indege ya mbere muri nyinshi z'igisirikare cy'Amerika zitwaye imfashanyo igenewe Venezuela, yageze mu mujyi wa Cucuta wo muri Colombia uri ku mupaka na Venezuela

Mu butumwa yatangaje ku rubuga nkoranyambaga rwa Twitter ku wa gatandatu, yagize ati: "Tuzakora ubukangurambaga imbere mu gihugu no hanze yacyo." Yongeyeho ati: "Urugamba rwacu rukomeje gutanga umusaruro!"

Uwufise ububasha kw’isanamu Reuters
Image caption Indege ya kabiri y'igisirikare cy'Amerika itwaye imfashanyo yahageze nyuma gato y'iya mbere, ndetse abategetsi bavuze ko izindi ndege zitwaye imfashanyo zizahagera mu minsi iri imbere

Ubwo yari mu kiganiro n'abanyamakuru mu mujyi wa Cucuta, Mark Green ukora mu kigo cy'Amerika gitanga imfashanyo cya USAID yavuze ko iyi mfashanyo yasabwe na Bwana Guaidó kuko Venezuela yugarijwe n'amakuba.

Yagize ati: "Abana barimo kwicwa n'inzara, kandi hafi ya buri bitaro byo muri Venezuela byugarijwe n'ikibazo cyo kubura imiti".

Yongeyeho ko ikibazo cya Venezuela kimaze kuba n'icy'akarere iherereyemo, aho Abanya-Venezuela miliyoni eshatu bamaze gusuhukira mu bihugu by'ibituranyi mu gushakayo ibiribwa n'imiti.

Bwana Green yagize ati: "Uyu munsi turi ku rugamba rwa rimwe mu masuhuka manini cyane yabayeho mu mateka y'Amerika y'epfo".

Uwufise ububasha kw’isanamu Reuters
Image caption Abagenzuzi b'umuryango wa leta zo ku mugabane w'Amerika bagenzura imfashanyo ubwo yageraga mu mujyi wa Cucuta muri Colombia

Uhagarariye Bwana Guaidó yavuze ko hari gushyirwaho n'ahandi hantu ho gukusanyiriza imfashanyo mu bihugu bya Brezili no mu birwa bya Caraïbes (Caribbean).

Yavuze ko hari guteganywa inama n'abategetsi ba Brezili muri iki cyumweru mu kunoza umugambi ujyanye n'ayo makusanyirizo muri leta ya Roraima - imwe mu zigize Brezili - iri ku mupaka na Venezuela.

Yongeyeho ko hari indi mfashanyo iri gukusanyirizwa i Miami muri Amerika ngo yoherezwe ahitwa Curaçao - ubutaka bw'igihugu cy'Ubuholandi buri mu birwa bya Caraïbes - mu cyumweru gitaha.

Bwana Maduro yavuze ko iyi mfashanyo ari igikorwa cyo kwigira mwiza cy'Amerika, ndetse ahakana avuga ko nta makuba ari mu gihugu cye.

Ku wa gatanu, yategetse igisirikare gukomeza kuba maso gikurikiranira hafi icyo yise "imigambi y'intambara" y'Amerika.