Menya iby'urubanza rwa Caster Semenya

Caster Semenya Uwufise ububasha kw’isanamu LAURENT GILLIERON
Image caption Caster Semenya ubwe yari mu rukiko igihe urubanza rwatangiraga

Caster Semenya wegukanye umudari wo kwiruka metero 800 mu mikino olimpike muri iki cyumweru ari mu rukiko rukemura imanza za siporo.

Ni mu rubanza aregamo urwego rushinzwe imikino olimpike ku isi - IAAF- ku byerekeranye n'amategeko mashya avuga ko umugore wavukanye imisemburo myinshi y'abagabo ya testosterone ayigabanya bitaba ibyo ntiyemererwe kwinjira mu mahiganwa.

Semenya avuga ko ayo mategeko mashya avangura naho IAAF yo ikavuga ko agamije kugirango abahiganwa bose bagire amahirwe amwe.

None bimeze gute?

Uru rubanza rurimo nde?

Caster Semenya, umukinnyi ngororangingo wo muri Afurika yepfo, yareze urwego rushinzwe imikino ngororangingo ku isi IAAF .

Urubanza rurimo gucibwa mu rukiko ruca imanza za siporo i Lausanne mu Busuwisi.

Yaba Semenya n'umukuru wa IAAF Lord Coe niho bari muri urwo rubanza.

None ibi ntibimaze igihe bivugwa?

Mu byukuri ibi ni ibintu bimaze myaka 10.

Kuva Semenya yesa umuhingo mu mikino ngororangingo yo muri 2009 i Berlin, hakomeje kwibazwa byinshi ku gitsina cye.

Icyo gihe hari n'abibajije niba atarafataga imiti itemewe n'amategeko yongerera abakinnyi ingufu.

Ntabwo byaribyo - ariko kubera ko asa n'abagabo kandi akaniruka bidasanzwe byatumye IAAF yotswa igitutu kugeza aho itangira kurushaho kumukoraho iperereza.

Semenya yasabwe ko bamupima kugirango bamenye neze igitsina afite - ubwo hari hasigaye amasaha atatu ngo asiganwe metero 800.

Uwufise ububasha kw’isanamu THOMAS LOHNES
Image caption Itsinzi za Semenya mu mikino y'i Berlin muri 2009 niyo yabaye imbarutso

Ukuntu iyo nkuru yasakaye byaramaganywe cyane

Hari n'abavuze ko iri ari ivanguramoko ry'imiryango yo mu Burayi ku mibiri y'abagore bo muri Afurika.

Ibyavuye muri iryo suzuma ry'igitsina cya Semenya ntabwo byitegeze bitangazwa ku mugaragaro.

Ikizwi gusa nuko Semenya afite imisemburo myinshi yavukanye y'abagabo yo mu bwoko bwa testosterone izwi nka hyperandrogenism.

Hagiye gukurikiraho iki?

Muri 2015, ikirego cyatanzwe n'umukinnyi w'umuhindi Dutee Chand cyatumye urukiko rusanga nta gihamya gihagije cyerekana ko imisemburo ya hyperndrogenism yongerera abakinnyi b'abagore imbaraga mu gusiganwa maze IAAF ihabwa imyaka ibiri kugirango ibe yazanye ibimenyetso.

Ariko muri 2016 Semenya yegukanye umudari wa zahabu muri metro 800 mu mikino olimpike y'i Rio amaze kwanikira cyane bagenzi be ku buryo bamwe basigaye barira,

Mu mpera ya 2018, IAAF yatangaje amategeko mashya avuga ko abakinnyi bafite imisemburo ya hyperandrogenism bagomba gufata imiti igabanya testosterone yabo.

Aya mategeko ariko areba metero 400, 800 na 1500 Semenya asanzwe asiganwamo ku buryo hari ababonye ko ariwe wibasiwe.

Nuko rero Semenya ahita arega urwego rushinzwe imikino olimpike ku isi IAAF avuga ko aya mategeko mashya atabereye bose.

Hyperandrogenism ni iki?

Muri make hyperandrogenism ni igihe umugore aba afite mu maraso ye imisembure myinshi y'abagabo yitwa testosterone.

IAAF ivuga ko abagore bafite iyi misemburo baba bafite amagufa, ingufu n'umubiri bimeze nk'iby'abagabo batangira kugira iyo batangiye kuba abasore.

Ngo nicyo gituma abagabo barusha abagore mu mahiganwa.

Semenya ashyigikiwe n'abande?

Semenya ashyigikiwe n'ishyirahamwe ry'imikino ngororangingo ryo muri Afurika yepfo ryasohoye intangazo rimutera inkunga.

Ministri wa siporo muri Afuriya yepfo nawe yavuze ko ayo mategeko mashya ya IAAF abangamiye uburenganzira bwa kiremwamuntu mu rwego mpuzamahanga.

Uwufise ububasha kw’isanamu Reuters
Image caption Umukuru wa IAAF Sebastian Coe

Abunganira Semenya mu mategeko bavuga ko abagore bavutse ari abagore bagakura ari abagore bakemerwa n'amategeko nk'abagore mu buzima bwabo bwose bagombye kwemererwa kujya mu mahiganwa y'abagore nta vangura.

None IAAF yisobanura gute?

Amategeko mashya ya IAAF ateganya kubuza abantu kujya mu marushanwa mu gihe imisemburo yabo ya testosterone myinshi itagabanijwe hakoreshejwe ubuvuzi.

Ngo ni ukugira ngo abahiganwa bose bagire amahirwe amwe.

Yinjira mu rukiko ku wa mbere, umukuru wa IAAF, Lor Coe yavuze ko amategeko mashya akenewe cyane.

Muri make IAAF itinya ko aya mategeko mashya aramutse atemewe, imikino y'abagore ishobora kwibasirwa n'abantu bahinduye igitsina n'abafite imisemburo myinshi y'abagabo.

Umwanzuro ntiworoshye

Uru rubanza mu by'ukuri rurakomeye, nta gisubizo cyoroshye gihari.

Akanama ka ONU gashinzwe uburenganzira bw'ikiremwa muntu ku isi gasa nakemeza ko amategeko mashya ya IAAF anyuranyije n'uburenganzira bw'ikiremwamuntu ku isi.

Ariko nanone impamvu abagabo n'abagore badasiganwa mu mu mikino imwe nuko abagabo bahora batsinda.

Ikibazo aho kiri ni ukumenya igipimo cy'imisemburo ya testosterone gikenewe kugirango ubwo busumbane bubeho.

Ibindi bisa n’ibi