Begum, wavuye mu Bwongereza akajya mu mutwe wiyita leta ya kisilamu, avuga ko adafite ubwenegihugu bwa Bangladesh

Begum Uwufise ububasha kw’isanamu PA

Leta ya Bangladesh yavuze ko ikibazo cya Shamina Begum, wavuye i Londres aho yabaga akajya mu ntagondwa zo mu mutwe wiyita Leta ya Kiyisilamu hashize imyaka ine, kireba gusa leta y'Ubwongereza.

Uyu mukobwa w'imyaka 19 wambuwe ubwenegihugu bw'Ubwongereza biravugwa ko yemerewe kugira ubwenegihugu bwa Bangladesh kubera ko nyina ariho avuka.

Shamina Begum yabwiye BBC ko atemeranya n'icyemezo cya minisiteri y'ubutegetsi bw'igihugu mu Bwongereza cyo kumwambura ubwenegihugu.

Avuga ko afite ubwenegihugu bumwe, ko atavukiye muri Bangladesh kandi ko atigeze ahakandagiza ikirenge.

Yavuze kandi ko yizeye ko Ubwongereza buzamwumva kubera ko yakoze ikosa rikomeye ryo kujya mu ntagondwa z'umutwe wiyita Leta ya Kiyisilamu.

Shamina Begum yari umunyeshuri wo mu mashuri yisumbuye igihe yavaga mu gace ka Bethnal Green mu mujyi wa Londres muri 2015 yerekeza muri Syria.

Uwufise ububasha kw’isanamu MET POLICE
Image caption Kadiza Sultana, Amira Abase and Shamima Begum (ibumos-iburyo) mu ifoto yatanzwe n'igipolisi bakimara kuva mu Bwongereza.

Mu cyumweru gishize yabonetse mu nkambi y'impunzi z'abanya Syria nyuma yo guhunga akarere ka Baghuz ka nyuma kakiri mu maboko y'umutwe wiyita Leta ya Kiyisilamu.

Yari yaravuye mu Bwongereza ari kumwe n'inshuti ze, Kadiza Sultana na Amira Abase.

Kadiza Sultana bivugwa ko ashobora kuba yarapfuye naho Amina Abase amaherezo ye ntabwo azwi.